मोरङ । सुन्दरहरैचा ४ बलियास्थित दौतरीबलिया बचत तथा ऋण सहकारी संस्था लि.ले सदस्य संस्थाहरुको हित प्रवर्धन हुने गरी काम गर्न नेफ्स्कूनको नवनिर्वाचित सञ्चालक समितिलाई आग्रह गरेको छ । सदस्यहरु सबल र सक्षम हुँदा नेफ्स्कून पनि बलियो हुने भन्दै संस्थाहरुलाई परेका समस्या समाधानका लागि पहल गर्ने र अभियानलाई सुशासित बनाउने दिशामा नवनिर्वाचित सञ्चालक समितिले काम गर्नुपर्ने दौतरीबलिया साकोसले जनाएको छ । नेफ्स्कून सञ्चालक समिति सदस्य निर्वाचित लक्ष्मी सापकोटा र शालिकराम ढकालसँग आज संस्थामा गरेको छलफलका क्रममा साकोसका तर्फबाट उक्त धारणा सार्वजनिक भएको हो । उक्त अवसरमा साकोसले नेफ्स्कूनका सञ्चालकद्वयलाई हार्दिक बधाई सहित कार्यकाल सफलताको शुभकामना समेत व्यक्त गरेको छ ।