काठमाडौं । प्रधानमन्त्री पुष्पकमल दाहाल प्रचण्डले सहकारी सम्बन्धी समस्या तत्काल समाधान गर्न सम्बन्धित मन्त्रालयसहितका निकायहरूलाई निर्देशन दिनुभएको छ। आज बिहान उपप्रधान तथा गृहमन्त्री नारायणकाजी श्रेष्ठ, भूमि व्यवस्था, सहकारी तथा गरिबी निवारण मन्त्री रन्जिता श्रेष्ठ, नेपाल सरकारका मुख्य सचिव डा. बैकुण्ठ अर्याल तथा सम्बन्धित मन्त्रालय, विभाग र निकायका अधिकारीहरूसँगको छलफलमा प्रधानमन्त्रीले सहकारीलाई समाजवादको भ्रूण खडा गर्ने, सामूहिकता र तल्लो वर्गको हितमा केन्द्रित गर्नेगरी ऐनमा नै व्यवस्था हुनुपर्ने बताउँदै तत्कालीन र दीर्घकालीन उपायहरू अपनाएर सहकारीलाई व्यवस्थित बनाउन तथा देखिएका समस्याहरु समाधान गर्न निर्देशन दिनुभयो ।

उहाँले सहकारीको अनुगमनका लागि प्रभावकारी नियामक निकाय बनाउनुपर्ने विषयमा आफ्नो ध्यान गएको भन्दै राम्रा, संकटमा रहेका र डुबेका सहकारीहरुको वर्गीकरण गरी प्रतिवेदन पेश गर्न हाल विद्यमान नियामक संस्थालाई निर्देशन दिनुभएको छ । प्रधानमन्त्रीले सहकारीमा बचतकर्ताले राखेको रकमको सुरक्षामा ध्यान दिन आग्रह गर्दै यसका लागि तिनै तहका सरकारको समन्वयमा प्रभावकारी कदम चाल्नुपर्नेमा जोड दिनुभयो।