काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्र प्रसाद ढकालले आज कोशी प्रदेशका दुई बचत संघ तथा एक स्थानीय तहसँग सहकारीको समसामयिक विषयमा अन्तरक्रियात्मक छलफल गर्नुभएको छ । उहाँले आज इलाम जिल्ला बचत संघकी अध्यक्ष मन न्यौपाने, निवर्तमान अध्यक्ष लीला प्रसाद थापा लगायतको टीमसँग छलफल गर्नुभएको हो । उक्त भेटमा नेफ्स्कूनकी निवर्तमान सञ्चालक गोमा नेपाल पनि सहभागी हुनुभएको थियो । यसैगरी, नेफ्स्कून अध्यक्ष ढकालले झापा बचत संघका अध्यक्ष तुलाराम न्यौपाने, उपाध्यक्ष एवम् नेफ्स्कून पूर्व सञ्चालक चन्द्राकुमारी खड्का भट्टराई लगायतको टीमसँग पनि छलफल गर्नुभएको हो ।

दुबै भेटमा उहाँले नेफ्स्कूनले जिल्ला बचत संघसँगको सम्बन्धलाई बलियो बनाउँदै लगिनेमा आश्वस्त तुल्याउनुभयो । उहाँले भन्नुभयो, ‘नेफ्स्कून र बचत संघहरु सँगैसँगै हिड्ने हो । हामीबीच सहकार्य बलियो बनाउँदै लानुपर्छ र त्यसका लागि नेफ्स्कूनले रणनीतिक दिशाबोध समेत छिट्टै गर्ने जानकारी गराउनुभयो । यस्तै, रोङ गाउँपालिकाका अध्यक्ष मनि कुमार स्याङ्बोसँग पनि आधारशिला कार्यक्रममा भैरहेको प्रगति र थप सम्भावनाबारे छलफल गर्नुभएको थियो । नेफ्स्कूनले रोङ गाउँपालिकासँगको साझेदारीमा स्थानीय सहकारीहरुको अवस्था विश्लेषण, क्षमता अभिवृद्धि लगायतका कामहरु गरिरहेको छ । यो सहकार्यलाई थप मजबूत बनाउन के गर्न सकिन्छ भन्ने विषयमा दुई अध्यक्षबीच छलफल भएको थियो ।