काठमाडौं । बागमती प्रदेश बचत तथा ऋण सहकारी संघ लि. (बागमती प्रोस्कून) को आयोजनामा यही फागुन १६ र १७ गते हुने ‘बागमती प्रदेश साकोस समिट–२०८०’ को तयारी जोडतोडका साथ भैरहेको छ । बागमती प्रोस्कूनले सहभागी दर्तादेखि कार्यपत्र प्रस्तोताहरुसँग समन्वयसँगै अन्य लजिष्टिक विषयमा तयारीहरु तीब्रताका साथ भैरहेको जनाएको छ । भक्तपुरको गठ्ठाघरस्थित जर्मनहोम हस्पिटालिटीमा हुने समिटमा बागमती प्रदेश भरका १३ वटै जिल्लाका तीन सय सहकारीकर्मीको सहभागिता रहने बागमती प्रोस्कूनले जनाएको छ । 

‘सहकारी सुदृढीकरणको आधारस् सहकार्य, एकता र विश्वास’ भन्ने मूल थिमका साथ हुन लागेको समिटको उद्देश्य सदस्य संघरसंस्थाका सञ्चालक तथा व्यवस्थापकको क्षमता विकासका लागि नयाँ विषयमा बहस चलाउने, सहकारीका असल अभ्यासहरुलाई धेरै संस्थामा पुर्‍याउने र अभियानमा ऐक्यवद्धता कायम गर्ने तथा सहकारी संस्कृतिलाई विशिष्ट संस्कृतिको रुपमा बचाइ राख्ने रहेको छ ।

त्यसैगरी अभियानका साझा सबालहरुमा साझा धारणा विकास गरी बहस पैरवीमा प्रभावकारिता ल्याउने, सहकारीका वर्तमान चुनौतीहरुको सामनाका लागि कार्यक्रममार्फत सबै संस्थालाई जागरुक गराउने र बचत तथा ऋण सहकारी सञ्जालमा कार्यगत एकता कायम गर्ने उद्देश्य रहेको बागमती प्रोस्कूनका अध्यक्ष उद्धव सापकोटाले बताउनुभयो ।

‘बचत संघहरुको ऐक्यवद्धता कायम गर्न, साझा धारणा विकास गर्न र अभियानलाई सही बाटो देखाउने उद्देश्यका साथ समिटको आयोजना गरिएको हो । समिटमा सहकारी क्षेत्रको वर्तमान समस्याका बारेमा पनि व्यापक छलफल हुनेछ’, अध्यक्ष सापकोटाले भन्नुभयो, ‘बागमती प्रदेशमा पनि समुदाय र सदस्यकेन्द्रित सहकारीहरु प्रशस्त छन् । ती संस्थाहरुमा समस्या आउन नदिन र अहिले देखिएको समस्याको निराकरणको लागि मार्ग प्रशस्त गरौं भन्ने सोचका साथ यो समिटको आयोजना गरिएको हो ।’

समिटमा नेपाल सरकारका पूर्व सचिव गोपीनाथ मैनालीले 'कानून कार्यान्वयन र अभियन शुद्धीकरणका लागिः सहकारी एकीकरण र वर्गीकरण‘ विषयमा र नेफ्स्कूनका प्रमुख कार्यकारी अधिकृत डा. शिवजी सापकोटाले 'सहकारीको वर्तमान आवश्यकताः साझा अभियानका लागि साझा सञ्जाल’ विषयमा कार्यपत्र प्रस्तुति गर्ने कार्यक्रम छ ।

यसैगरी, दक्ष जनशक्ति पलायन मुलुककै समस्या बनिरहेको समयमा सहकारीमा यसको प्रभाव कस्तो र कति देखिएको छ, कसरी जनशक्ति भित्राउने र उनीहरुलाई उत्प्रेरणा प्रदान गर्ने, सहकारी सुशासन प्रवर्धनमा प्रविधिमैत्री कारोबार, सहकारी सुदृढीकरणको आधार, सहकारीमा सम्पत्ति शुद्धीकरण निवारणको विषय र यसका भावी जोखिम र कार्यान्वयन रणनीति आदि बारे पनि विषय विज्ञहरुबाट कार्यपत्र प्रस्तुतिसहित सहभागीहरुका जिज्ञासाहरु सम्बोधन गरिने  बागमती प्रोस्कूनले जनाएको छ । 

बागमती प्रदेश भित्रका १३ वटा जिल्ला बचत संघ सह आयोजकको रुपमा रहेको छन् । त्यसैगरी बागमती प्रदेश संस्कृति, पर्यटन तथा सहकारी मन्त्रालय, राष्ट्यिसहकारी विकास बोर्ड र नेफ्स्कूनको सहकार्यमा समिट हुन लागेको हो । समिटले वर्तमान समयमा सहकारी क्षेत्रमा देखिएका समस्याको पहिचान गरी समाधानमा समेत मार्ग प्रशस्त गर्ने दाहालले बताउनुभयो । बागमती प्रदेशमा करिब ८ हजार बचत तथा ऋण सहकारी संस्था छन् ।