एशियाली ऋण महासंघ (अकू) को आयोजनामा इन्डोनेसियाको बालीमा आगामी भदौं १७ गतेदेखि २२ गते (सेप्टेम्बर २ देखि ७) सम्म सञ्चालन हुने अकू फोरम २०२४ मा सहुलियत रकममा सहभागिताको लागि नाम दर्ता गर्ने मिति नजिकिएको छ । अकूका अनुसार फोरममा सहभागी हुन चाहनेहरुले २०८१ जेठ १८ गते (मे ३१) सम्म नाम दर्ता गराइसक्दा १ सय अमेरिकी डलर छुट सुविधा प्राप्त गर्नेछन् । 

इच्छुक सहभागीहरुले आफू सहभागी हुन चाहेको कार्यक्रम छनौट गरी नेपाल राष्ट्र बैंकले तोकेको विनिमय दर बमोजिम हुन आउने रकम र व्यवस्थापन शुल्क जम्मा गर्नुपर्ने छ । अकू फोरम २०२४ अन्तर्गत सेप्टेम्बर २ देखि ४ सम्म प्रि फोरम सञ्चालन हुनेछ भने सेप्टेम्बर ५ देखि ७ सम्म फोरम आयोजना हुनेछ । 

अकूका सदस्य राष्ट्रका क्रेडिट युनियनहरुबाट बाक्लो सहभागिता रहने फोरम सहभागीहरुबीच सिकाइ आदानप्रदानसँगै सम्बन्ध विस्तारको साझा मञ्चका रुपमा स्थापित छ । प्रत्येक अकू फोरमलाई क्रेडिट युनियन अभियानका साझा मुद्दाहरुमा बहस गर्ने, चुनौतीहरुको चर्चा गर्ने र सम्भावनाहरु केलाउने अनि भावी रणनीतिहरु तय गर्ने प्लेटफर्मका रुपमा लिइन्छ ।

नेपाली साकोस अभियानबाट पनि प्रत्येक अकू फोरममा बाक्लो सहभागिता रहँदै आएको छ । अकूले यो पटक पनि सोही प्रकारको बाक्लो र उत्साहजनक सहभागिता रहने विश्वास व्यक्त गरेको छ । अकू फोरम २०२४ एउटा सामान्य जमघट मात्र नभई रुपान्तरणकारी अनुभव हुने दाबी पनि गरेको छ । यस पटकको अकू फोरमको थिम Rooted Resilience: Bridging Gaps for a Sustainable Future रहेको छ ।