भक्तपुर ।  भक्तपुर जिल्ला बचत तथा ऋण सहकारी संघ लि.को तालिम व्यवस्थापन उपसमितिको आयोजनामा जेठ १७ र १८ गते दुई दिवसीय कर तथा कोष व्यवस्थापन तालिम सम्पन्न भएको छ ।तालिमको समापनमा संघका अध्यक्ष कृष्ण गोविन्द लाखाजुले सहकारी संस्थामा आयकर ऐन पूर्व कर तिर्नु नपर्ने प्रावधान स्मरण गर्दै सामुदायिक सदस्य केन्द्रीत सहकारी संस्थालाई पूर्ण कर छुटको बन्दोबस्त हुनुपर्ने बताउनुभयो । तर केही सहकारी संस्थाहरुले सहकारीको नाममा व्यक्तिगत फाइदा लिने विकृतिले  गर्दा राज्यले सहकारी ऐन २०७४ मा भएको व्यवस्था भन्दा पनि बढी आयकर उठाएको उहाँको भनाइ थियो । 

सहकारी क्षेत्रमा देखापरेका समस्या समाधान कार्यदलले दिएका सुझावहरु कार्यान्वयनमा सरकार गम्भीर भएर लाग्नुपर्ने उहाँले बताउनुभयो । उहाँले सहकारीको नाममा बचत दुरुपयोग एवं बदमासी गर्नेहरुलाई कार्वाही गरी बचत सुरक्षा गर्न सरकारले बिलम्ब गर्न नहुने विचार राख्नुभयो । 

संघका संचालक एंव उपसमितिका संयोजक इन्द्र प्रसाद व्यान्जुले सहकारी संस्थामा कार्यरत कर्मचारी तथा संचालकहरुमा कर तथा कोषको प्रभावकारी व्यवस्थापन गर्न सकून भने उद्देश्यले तालिमको आयोजना गरेको बताउनुभयो । तालिमले संस्थाको कर योजना तथा व्यवस्थापनले सम्भाव्य दण्ड जरिवानाबाट बच्न टेवा पु¥याउने विचार व्यक्त गर्नुभयो ।

संघका व्यवस्थापक बालकृष्ण धोजुले धन्यवाद मन्तव्य दिदैं सिकेका कुराहरु कार्यरत संस्थामा व्यावहारिक प्रयोग गर्नुको साथै अरुलाई पनि सिकाइ हस्तान्तरण गर्नुपर्ने विचार राख्नुभयो । सि.ए. विजय सुकुपायोले कर व्यवस्थापनबारे सहजीकरण गर्दै प्रभावकारी करको व्यवस्थापनले अनावश्यक दण्ड जरिवानाबाट बच्ने कुरा बताउनुभयो ।

तालिमको समापन कार्यक्रम सञ्चालन कर्मचारी रोकेश जोशीले गर्नुभएको थियो । तालिममा सहभागीहरुले धेरै कुराहरु सिक्न पाएकोमा खुसी व्यक्त गर्दै तालिमबाट अग्रिम कर कट्टी, कर दरहरु, राजश्व शिर्षक, अनलाइन कर दाखिला, इटिडिएस, कोष वाँडफाँड, कोषको उपयोगिता लगाएतका विषयहरु सिकेको बताउनुभयो । भक्तपुरमा आयोजित तालिममा संस्थाका संचालक एवं कर्मचारी गरी ३६ जनाको सहभागिता थियो ।