गैँडाकोट । सहकारीहरु समस्याग्रस्त बन्दै गएका छन् भन्ने भाष्य देशैभरि फैलिएका बेला विजय विकास स्रोत केन्द्र, विकू सहकारी र विजय एफएमले नवलपुरमा सहकारी संवाद गरेको छ । संवादमा नेफ्स्कूनका अध्यक्ष चन्द्रप्रसाद ढकाल लगायत सहकारी विज्ञहरुले सहकारीहरु समस्याग्रस्त नभएको तर सतर्कता अपनाउन आवश्यक भएको बताउनुभएको छ । विजय विकास स्रोत केन्द्रको ४६ औँ स्थापना दिवशको अवसरमा गैँडाकोटमा सहकारी संवाद गरिएको हो । “सहकारीमा सुशासनः असल अभ्यास, चुनौतीहरु र अबको बाटो” विषयमा सहकारी विज्ञहरुबीच छलफल गरिएको छ । 

छलफलमा नेपाल बचत तथा ऋण केन्द्रीय सहकारी संघ लिमिटे (नेफ्स्कून) का अध्यक्ष चन्द्रप्रसाद ढकालले सुशासनलाई ध्यान दिन नसकेकै कारण केही सहकारीहरुमा समस्या आएको बताउनुभयो । उहाँले सबै सहकारीमा समस्या नआएको भन्दै सदस्य केन्द्रित समुदायमा आधारित र सदस्यसँग निकट रहेका सहकारीहरुमा कुनै समस्या नरहेको जीकिर गर्नुभयो ।

काठमाण्डौ विश्वविद्यालयका रजिष्ट्रार प्राध्यापक डाक्टर अच्युत वाग्लेले सहकारी ऐन, सहकारीको सञ्चालन र अभ्यासको तालमेल नमिल्दा सहकारीमा समस्या देखिएको बताउनुभयो ।

सामाजिक एवं राजनीतिक विश्लेषक हरि शर्माले विश्वासले सिर्जना गरेको समुदायभित्रको सहकारीमा समस्या नभएको र सहकारीलाई पैसाको दृष्टिकोणबाट मात्र नभएर सामाजिक महत्त्वका क्षेत्रबाट पनि हेर्न जरुरी रहेको बताउनुभयो ।

संस्थागत विकास एवं सुशासन विज्ञ नम्रता शर्माले सहकारीहरुभित्र वित्तिय सचेतनाकै कमिका कारण समस्या सिर्जना भइरहेको बताउनुभयो । सहकारीमा जान्ने सुन्ने बर्गकै नियतका कारण समस्या थपिएको शर्माले बताउनुभयो । 

राष्ट्रिय सहकारी बैङ्क लिमिटेडका प्रमुख कार्यकारी अधिकृत बद्रिकुमार गुरागाईंले साना सहकारीमा सामाजिक भावना छ, ठूला सहकारीमा वित्तिय अनुशासनको संस्कार नहुँदा समस्या बढेको बताउनुभयो । 

 समूह छलफलमा सहकारी विज्ञ केशवप्रसाद सापकोटाले सहजीकरण गर्नुभएको थियो ।  कार्यक्रममा विकू बचत तथा ऋण सहकारी संस्था लिमिटेडका अध्यक्ष प्रेम सापकोटा र महिला मिलन बचत तथा ऋण सहकारी संस्थाका प्रमुख व्यवस्थापक फुलमाया मोक्तानले सहकारीका असल अभ्यासका सन्दर्भमा प्रस्तुती राख्नुभएको थियो ।

कार्यक्रममा विजय विकास स्रोत केन्द्रका उपाध्यक्ष खड्गजङ्ग गुरुङले अतिथिहरुलाई स्वागत एवं धन्यवाद ज्ञापन गर्नुभएको थियो । औपचारिक कार्यक्रमको सञ्चालन संस्थाका सचिव डा. भूमिराज चापागाईंले गर्नुभएको थियो । 

विजय विकास स्रोत केन्द्रका अध्यक्ष कृष्णप्रसाद सापकोटाले सामाजिक सद्भाव, सहकार्य, सहअस्तित्वको भावनालाई अघि बढाउन विजय विकास स्रोत केन्द्रले विभिन्न संस्थाहरुसँगको सहकार्यमा कार्यक्रम गर्ने नीति लिएको बताउनुभयो । सचेतनाकै कमीका कारण समस्या सिर्जना भइरहेको बताउनुभयो । सहकारीमा जान्ने सुन्ने वर्ग कै नियतका कारण समस्या थपिएको शर्माले बताउनुभयो ।