काठमाडौं । चितवन जिल्लाको सहकारी अभियानले सहकारी संस्थाका कर्मचारीमाथि हालै भएको आक्रमणको घोर भर्त्सना गर्दै दोषीमाथि कडा कारबाहीको माग गरेको छ ।

भरतपुर महानगरपालिका-११ स्थित गणेशस्थान बचत तथा ऋण सहकारी संस्थाका व्यवस्थापक एवम् अन्य तीन कर्मचारीमाथि कुटपिट भएको भन्दै उक्त घटनाको निन्दा गर्दै अभियानले दोषी उपर कारबाहीको जोडदार माग गरेको छ ।

जिल्ला सहकारी संघ चितवन तथा चितवन जिल्ला बचत तथा ऋण सहकारी संघ लि. ले संयुक्त प्रेस विज्ञप्ति जारी गर्दै असार १८ गते दिउँसो करिब साढे ३ बजेतिर संस्थाका ऋणी सदस्य रिया कुमालसँगै १२/१४ जनाको समूह संस्थाको कार्यालय प्रवेश गरी व्यवस्थापक लगायत केही कर्मचारीलाई कुटपीट गर्नुका साथै कार्यालयको अवस्था लथालिङ्ग पारेको भन्दै घटनाको भर्त्सना गरेका हुन् । साथै उनीहरुले घटनाका दोषीहरु खोजतलास गरी शीघ्र कारबाही गर्न पनि जोडदार माग गरेका छन् ।