काठमाडौं । पोखराको पुरन्चौरमा मुख्य कार्यालय रहेको जनसेवा बचत तथा ऋण सहकारी संस्थाले सदस्यहरुमा उद्यमशीलता विकास गर्ने उद्देश्यका साथ एकल अंकमा ऋण लगानी गर्ने भएको छ । उद्यमशिलता तथा व्यावसायिक परियोजनाको आधारमा सदस्यहरुलाई ५ बर्षसम्मका लागि ९.८५ प्रतिशत ब्याजदरमा ऋण लगानी गर्ने योजना साकोसले सार्वजनिक गरेको हो । 

सदस्यहरुको कृषि,पशुपालन र व्यापार व्यववसायलाई विशेष प्राथमिकतामा राखेर ऋण लगानी गर्न लागेको हो । सहकारी संस्थाहरुले पनि एकल अंकमा ऋण लगानी गर्न सक्ने र  बैंक वित्तीय संस्थाकै सरह सस्तो ब्याजमा ऋण पाएपछि सदस्यहरुलाई व्यवसाय विस्तारमा टेवा पुग्ने विश्वास साकोसले लिएको छ ।

 पछिल्लो समय सहकारी संस्थाहरुमा तरलता वृद्धि  हुँदै गएको छ भने कतिपय संस्थामा त अधिक तरलताको समस्या रहेको छ । सरकारले सहकारीमा ऋण लगानीको लागि  १६ प्रतिशत सन्दर्भ ब्याजदर तोकिदिएको छ । तर कतिपय सहकारी संस्थाले सन्दर्भ ब्याजदर भन्दा पनि तल गएर  सदस्यहरुलाई सस्तो र सरल रुपमा ऋण प्रवाह गर्ने उदेश्यका साथ एकल अंकमा ऋण  लगानी गर्दै आएका छन् ।

जनसेवा सहकारीको पछिल्लो विवरण अनुसार शेयर पुुँजी ३ करोड ६६ लाख ९३ हजार, जगेडा कोष २ करोड १८ लाख १८ हजार, बचत संकलन ३२ करोड ४५ लाख ७७ हजार र ऋण लगानी २८ करोड ४१ लाख बढी रहेको छ । संस्थाको अन्य कोषहरुमा ६० लाख ३७ हजार, संस्थागत पुँजी २  करोड ३७ लाख ८७ हजार र कुल सम्पत्ति ४० करोड ४४ लाख ३९ हजार रहेको छ । संस्थामा गत असार मसान्तमा ३२.२३ प्रतिशत तरलता रकम रहेको छ । २ हजार ३८७ जना शेयर सदस्यहरुको संस्थामा ४ सय ६६ जना सदस्यले संस्थाबाट ऋण लिएर व्यापार व्यवसाय गर्दै आएका छन् ।