भक्तपुर । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्र प्रसाद ढकालले सहकारी अभियानको छवि पुनर्स्थपित गर्न धेरै काम गर्नुपर्ने आवश्यकता औल्याउनुभएको छ । यसका लागि अभियान नेतृत्वको काँधमा गहन जिम्मेवारी भएको स्वीकार्दै त्यो निर्वाह गर्न कुनै कसर बाँकी नराख्ने प्रतिवद्धता समेत उहाँले व्यक्त गर्नुभयो । 

रौतहटको चन्द्रपुरस्थित नवविकास बचत तथा ऋण सहकारी संस्था लि. का सञ्चालकहरुको क्षमता विकास तालिम (सीयूडीसीसी) को हिजो भक्तपुरको नगरकोटमा उद्घाटनका क्रममा प्रमुख अतिथि नेफ्स्कून अध्यक्ष ढकालले उक्त विचार राख्नुभएको हो ।

साकोसका अध्यक्ष राजेन्द्र तिवारीले अध्यक्षता गर्नुभएको तालिम कार्यक्रममा  रौतहट जिल्ला बचत तथा ऋण सहकारी संघका महासचिव एवम् साकोसका निवर्तमान अध्यक्ष देव बहादुर सापकोटासँगै १७ जनाको सहभागिता रहेको छ ।

उद्घाटनमा नेफ्स्कून अध्यक्ष ढकालले सुशासन, इमानदारी, पारदर्शिता, एकता, सदस्य हित जस्ता सहकारीका अन्तर्निहित मूल्य, मान्यतासँगै सिद्धान्तको टेको टेकेर निन्तरत अघि बढ्ने विश्वास दिलाउनुभएको हो । यसैगरी, प्रारम्भिक संस्थाहरुले पनि आफ्नो तर्फबाट झनै गहन जिम्मेवारी निर्वाह गर्नुपर्ने भन्दै छवि पुनर्निर्माणका लागि आफ्ना नीति, कार्यक्रम, रणनीति, कार्ययोजना आदि निर्माण गर्दा सदस्य र समुदाय केन्द्रित हुनुपर्नेमा उहाँले जोड दिनुभयो । यसो गर्न सक्दा सदस्यहरुले संस्थाप्रति अपनत्व महशुस गर्ने उहाँले बताउनुभयो । 

सहकारीका सदस्यहरुले आफ्नो मान्दा संस्थाग्रत ग्रोथ समस्या नहुने र यसले सम्रग अभियानको छवि स्थापित हुने दाबी गर्नुभयो । ‘मुख्य कुरा भनेको हामीले सदस्यको विश्वास आर्जन गर्ने काम गर्नुपर्दछ, ’अध्यक्ष ढकालले भन्नुभयो, ‘तपाई सञ्चालकहरुले सदस्यहरुलाई नवविवकास साकोसको इतिहास र स्थापनाकालीन मर्म बुझाउन सक्नुपर्दछ । सँगै उक्त मर्मलाई आत्मसात गरी संस्थाको व्यवहारमा लागू गर्नुपर्दछ ।’

उहाँले अगाडि भन्नुभयो, ‘हामीले अन्य सहकारीहरुले गरेका राम्रा कार्यहरु अवलोकन गर्ने, सिक्ने र असल अभ्यासहरुलाई लागू गर्न सक्यौं भने त्यसले सदस्य र समुदायलाई हित हुन्छ ।’ उहाँले संस्थाले कति सदस्यहरुलाई जोड्यो, वित्तीय पहुँचविहिन कति सदस्यहरुलाई जोड्न सक्यो भन्ने लेखाजोखा गरी अघि बढ्नुपर्ने सुझाव उहाँको थियो । मूलतः यस्तै कार्यहरुले सहकारीको छवि पुनस्र्थापित गर्न मद्दत गर्ने अध्यक्ष ढकालको भनाइ थियो ।

सहकारीमार्फत प्रचूर काम गर्न सकिने वास्तविकता बताउँदै सञ्चालकहरुले ‘हामी सदस्यका लागि काम गर्न आएका हौं’ भन्ने बोध गरेर काम गनुपर्ने उल्लेख गर्नुभयो । यी विषयहरुलाई केन्द्रमा राखेर सेवा विविधिकरणको आवश्यकतामा समेत अध्यक्ष ढकालले जोड दिनुभयो ।

उद्घाटन कार्यक्रममा मधेश प्रदेशको सानको रुपमा रहेको नवविकास साकोसको गर्विलो इतिहास, उपलब्धिसँगै नयाँ सञ्चालक समितिको गहन जिम्मेवारीसँगै भावी रणनीति र सदस्य सेवाका विषयमा अध्यक्ष तिवारीले धारणा राख्नुभएको थियो । यसैगरी, ४ वर्ष निरन्तर प्रोवेसन ब्राण्ड प्राप्त साकोसले भावी दिनमा थप सक्रियताका साथ सदस्य सेवामा समर्पित गर्ने धारणा पनि राखिएको थियो ।

नवविकास साकोस हाल नेफ्स्कूनले एशियाली ऋण महासंघ (अकू) को प्राविधिक सहयोगमा सञ्चालन गरेको अन्तर्राष्ट्यि स्तरको एक्सेस स्तरीकरण कार्यक्रममा आवद्ध छ ।

३० जनाको सहभागिता रहेको तालिममा आज नेफ्स्कूनका प्रमुख कार्यकारी अधिकृत डा. शिवजी सापकोटाले सहकारीमा नेतृत्व विकास तथा छवि निर्माणबारे सत्र सहजीकरण गर्नुभएको छ । तालिम सहजीकरण संघका सहायक कार्यकारी अधिकृत गणेशप्रसाद तिमल्सिना तथा अनुगमन अधिकृत सुमनराज घिमिरेले गर्नुभएको छ ।