काठमाडौं । पोखरा महानगरपालिका वडा नं १२ ढिकालेथर चोकस्थित ढिकालेथर महिला बचत तथा ऋण सहकारी संस्था लि. ले १२ औ बार्षिक साधारण सभा कार्तिक ३ गते शनिबार सम्पन्न गरेको छ । साकोसकी अध्यक्ष सृजना आचार्य सिग्देलको अध्यक्षतमा भएको कार्यक्रममा नेपाल बचत तथा ऋण केन्द्रीय सहकारी संघ लि. (नेफ्स्कून) की संचालक सदस्य कमलादेवी गिरी प्रमुख अतिथि रहनुभएको थियो ।

सभामा नेफ्स्कून संचालक गिरीले वर्तमान अवस्थामा सहकरीमा देखिएको समस्या र समाधानबारे चर्चा गर्दै बचत ऋण सहकारीको केन्द्रीय संघको रुपमा नेफ्स्कूनले जल्दाबल्दा विषयमा जारी राखेको बहसपैरवी, क्षमता अभिवृद्धिका लागि निरन्तर गरिरहेको तालिम, शिक्षा कार्यक्रम, सदस्य साकोसहरुको गुणस्तर सुनिश्चितताका लागि सञ्चालनमा रहेका कार्यक्रमहरु, स्थिरीकरण कोष, सञ्जाल साझेदारी लगायतका विषयमा जानकारी गराउनुभएको थियो ।

उहाँले सदस्य हितलाई केन्द्रमा राखेर संघले रणनीतिक योजना निर्माण तथा लागू गरेको जानकारी गराउनुभएको थियो । साथै उहाँले ढिकालेथर महिला साकोसले समयमै वार्षिक साधारण सभा सम्पन्न गरेकोमा बधाई शुभकामनासँगै महिलाहरुले सञ्चालन गरेका सहकारीहरु उदाहरणीय बनेको तथ्य पनि पस्कनुभएको थियो ।

सभामा कास्की जिल्ला सहकारी संघ तथा राष्ट्रिय सहकारी बैककी लेखा सुपरिवेक्षण समिति सदस्य चन्द्रा ढकाल पराजुलीले सबै मिली आफ्नो आर्थिक, सामाजिक र सांस्कृति माथि उठाउन गरिएको सामुहिक प्रयास नै सहकारी भएको धारणा राख्नुभयो । सभामा साकोसकी संस्थापक अध्यक्ष जमुना आचार्य, सल्लाहकारद्धय कुलप्रसाद दाहाल, बलवहादुर कार्की, शेयर सदस्य भगवती बाँस्तोला र छिमेकी संस्था सुनौलो भविष्य महिला बचत तथा ऋण सहकारी संस्था लि. की अध्यक्ष प्रतिभा तिमिल्सिना लगायतले शुभकामनसहित समसामयिक विषयमा धारणा राख्नुभएको थियो ।

सभामा साकोसकी उपाध्यक्ष सीता गौतम दाहालले स्वागत र सचिव प्रभा तिमिल्सिनाले आचार्यले कार्यक्रम सञ्चालन गर्नुभएको थियो ।