काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) की सञ्चालक सदस्य कमलादेवी गिरीले पोखराका विभिन्न साकोसका महिला व्यवस्थापकहरुसँग हिजो मिठो अन्तरक्रिया गर्नुभएको छ । नेफ्स्कून पोखरा सदस्य सेवा कार्यालय व्यवस्थापन उपसमिति संयोजक समेत रहनुभएकी गिरीले स्थानीय साकोसका महिला व्यवस्थापकहरुसँग समसामयिक विषयमा मिठो अन्तरसंवाद गर्नुभएको हो ।

व्यवसाय प्रवर्धन तथा अन्तरक्रिया कार्यक्रम अन्तर्गत यो पटक स्थानीय साकोसको व्यवस्थापकीय बागडोर सम्हालेका महिलाहरुसँग नेफ्स्कूनले अन्तरक्रिया गरेको हो । हिजोको अर्को मिठो संयोग भनेको कार्यक्रमको व्यवस्थापन तथा सञ्चालन पनि नेफ्स्कून पोखरा सदस्य सेवा कार्यालयकी महिला इन्चार्ज दिप्ती आचार्यले गर्नुभएको थियो ।

यसरी, नेफ्स्कून संचालक, सेवा कार्यालय इन्चार्ज तथा सहभागीहरु सबै महिला रहनुभएको थियो । केवल महिलाहरुको उक्त माहोलमा स्वाभाविक रुपमा महिला सशक्तिकरणका सवालहरुले प्राथमिकता पाएको थियो । नेफ्स्कूनकी सञ्चालक गिरीले सहकारीमार्फत महिला सशक्तिकरण सम्भव भएको भन्दै महिलाहरुले दुबै हिसाबले 'लीड' गरेका संस्थाहरुमा सुशासनमा समस्या नआएको बताउनुभएको थियो ।

साथै उहाँले संघका तालिम कार्यक्रममा सदस्य संघ संस्थाहरुको सहभागिता वृद्धिसँगै नेफ्स्कूनको पछिल्लो वित्तीय अवस्था, संघका कार्यक्रम तथा पैरवीहरुबारे धारणा राख्नुभएको थियो ।