चितवनका दुई महिला साकोसका सदस्यहरुले दिगो एकीकृत कृषि प्रणाली सम्बन्धमा विषय विज्ञबाट जानकारी प्राप्त गरेका छन् । बचत ऋण सहकारीमा आवद्ध महिला सदस्यहरुलाई कसरी आत्मनिर्भर बनाउन सकिन्छ, स्वरोजगार सृजनाका उपायहरुसँग परिचित गराउन सकिन्छ र कृषि कर्ममा तल्लीनहरुलाई कसरी एकीकृत कृषि प्रणाली र व्यावसायिकता विकाससँग जोड्न सकिन्छ भनेर अनुशिक्षण कार्यक्रम आयोजना गरिएको हो ।

कार्यक्रममा सहभागी २७ महिलाहरुले एकीकृत कृषि प्रणालीबारे चाख लागेर जानकारी लिनुका साथै आफ्ना जिज्ञासाहरुको जवाफ विज्ञबाट लिएका छन् । चितवनस्थित दुई महिला साकोसहरु प्रभात दिदीबहिनी तथा हिमाली ब्राह्मी महिला साकोसका सदस्यहरुलाई उक्त अनुशिक्षण प्रदान गरिएको थियो । यो अवसर नेपाल बचत तथा ऋण केन्द्रीय सहकारी संघ लि. (नेफ्स्कून) को चितवन सदस्य सेवा कार्यालयले जुराइदिएको हो ।

नेफ्स्कूनकी उपाध्यक्ष शान्ति अधिकारीले सान्दर्भिक कार्यक्रम आयोजना गरी महिला दिदीबहिनीहरुलाई कृषि कर्मका बारे थप जानकारी उपलब्ध गराउन सकिएको विश्वास व्यक्त गर्नुभयो । अनुशिक्षण कार्यक्रम सहजीकरण भरतपुर महानगरका कृषि विज्ञ प्रकाश न्यौपानेले गर्नुभएको नेफ्स्कून चितवन सदस्य सेवा कार्यालय प्रमुख यमकला सुवेदीले जानकारी गराउनुभयो ।