काठमाडौं । नेफ्स्कूनको सदस्य संस्था दमकस्थित स्वर्णलक्ष्मी बचत तथा ऋण सहकारी संस्था लि.अन्तर्राष्ट्रिय मान्यताप्राप्त एक्सेस स्तरीकरण कार्यक्रममा आवद्ध भएको छ । २०८१ मंसिर १ गते स्वर्णलक्ष्मी साकोसमा आयोजित संक्षिप्त कार्यक्रममा संस्थाको सञ्चालक समिति तथा उच्च व्यवस्थापन र नेफ्स्कूनबीच द्धिपक्षीय सम्झौता भएको हो ।

उक्त सम्झौता कार्यक्रममा साकोसका अध्यक्ष बुद्धिसागर बराल, सचिव संजिव रिमाल, सञ्चालक सदस्य प्रेम कुमारी रिजाल तथा राजेन्द्र श्रेष्ठ, व्यवस्थापक कमल कुमार घिमिरे लगायतको उपस्थिति थियो भने नेफ्स्कूनकातर्फबाट अधिकृतद्वय रिसभराज रेग्मी र सुमनराज घिमिरे सहभागी हुनुभएको थियो । नेफ्स्कूनका कार्यक्रम अधिकृत घिमिरेले एक्सेस स्तरीकरण कार्यक्रमबारे संक्षिप्त प्रस्तुतीकरण समेत गर्नुभएको थियो ।

अन्तर्राष्ट्रिय स्तरको एक्सेस स्तरीकरण कार्यक्रममा आबद्धताले संस्थागत विकास, वित्तीय स्वास्थ्य, सदस्य सेवा र सुशासनमा उल्लेख्य फड्को मार्ने विश्वास साकोसले लिएको छ । एक्सेस स्तरीकरण कार्यक्रम नेफ्स्कून र एशियाली ऋण महासंघ (अकू) को प्राविधिक सहकार्यमा विगत लामो समयदेखि सञ्चालन हुँदै आएको छ । एक्सेस ब्राण्ड संस्थाको राष्ट्रिय अन्तराष्ट्रिय छविसँग जोडिएकाले पनि साकोसहरुमा यसप्रतिको आकर्षण बढ्दो छ ।

१ अर्ब १६ करोड बढी कुल सम्पत्ति रहेको स्वर्णलक्ष्मी साकोसका हाल ४ सेवा केन्द्र छन् ।