काठमाडौं । नेफ्स्कूनको ३३औं वार्षिक साधारणसभाको मिति नजिकिदैं गर्दा देशैभरका यसका सदस्य संघ संस्थाहरुमा उत्साह सञ्चार भएको छ । साकोस अभियानलाई मार्गदिर्नेशित गर्ने केन्द्रीय संघको साधारणसभामा सहभागी भई निर्णयप्रक्रियामा सामेल हुने अवसर छुटाउन नहुने भन्दै सदस्यहरु उत्साहित भएका हुन् । यस्तै, सकारात्मक उत्साह नेफ्स्कून दाङ सदस्य सेवा कार्यालय अन्तर्गतका सदस्य साकोसहरुमा पनि रहेको पाइएको छ ।  

नेफ्स्कूनका बरिष्ठ उपाध्यक्ष एवम् सदस्य सेवा कार्यालय व्यवस्थापन उपसमिति संयोजक दामोदर अधिकारीको अध्यक्षतामा दाङ सदस्य सेवा कार्यालय अन्गर्तका साकोसहरुका अध्यक्षहरुसँग आज सम्पन्न अन्तरक्रिया कार्यक्रममा पुस ५ र ६ गते बुटवलमा हुने संघको साधारणसभामा सहभागी हुने विषयमा एकमत भएको हो । यसैगरी, आसपासका अन्य साकोसहरुलाई पनि साधारणसभामा सहभागिताका लागि आग्रह गर्ने सहमति भएको छ । 

नेफ्स्कूनको ३३ औं वार्षिक साधारणसभा सहभागिता सहजीकरण अन्तरक्रिया कार्यक्रममा सहभागीहरु दाङ र प्युठानका साकोसका अध्यक्षहरुले नेफ्स्कूनको वास्तविक स्थिति थाहा पाउन, सञ्चालक समितिको प्रतिवद्धताहरु र प्रतिवेदनबारे प्रष्ट हुन तथा भावी रणनीति तय गर्ने कार्यमा सहभागी हुने अधिकारको पूर्ण सदुपयोग गर्न बुटवल जाने विचार व्यक्त गर्नुभएको थियो ।

उक्त अवसरमा नेफ्स्कूनका बरिष्ठ उपाध्यक्ष अधिकारीले सभाको मुख्य उद्देश्य र मर्म मर्न नदिइ आन्तरिक पर्यटनको प्रवर्धनमा सहकारी क्षेत्रले हातेमालो गर्ने अवसरका रुपमा समेत यो साधारणसभाको तयारी भएको जानकारी गराउनुभयो ।

यसले सरकार र सहकारी अभियानको सम्बन्ध तथा समुदाय र सहकारीको सम्बन्ध पनि झनै बलियो बन्ने विश्वास उहाँले व्यक्त गर्नुभयो । संघको ३३औं वार्षिक साधारणसभा व्यवस्थापन उपसमितिका समेत संयोजक बरिष्ठ उपाध्यक्ष अधिकारीले यो दुई दिने साधारणसभा साकोस अभियानको समसामयिक विषयमा विषयविज्ञहरुबाट हुने गहन प्रस्तुतीकरणका कारण पनि विशेष हुने दाबी गर्नुभयो । 

आजको अन्तरक्रियामा संघको सदस्य सेवा कार्यालय व्यवस्थापन उपसमितिका सदस्यहरु शिवध्वज मल्ल, नेत्रमणि आचार्य, सुष्मा कुमारी रेग्मी र दुर्गा प्रसाद शर्मा लगायतको सहभागिता थियो । यसैबीच, आजै दाङ सदस्य सेवा कार्यालय व्यवस्थापन उपसमितिको बैठक समेत बसी संघको आसन्न वार्षिक साधारण सभालाई सभ्य र भव्य रुपमा सम्पन्न गर्ने दिशामा जिम्मेवारीपूर्वक काम गर्ने, आवश्यक सबै तयारी गर्ने, सक्रियता  प्रदर्शन गर्ने र व्यापक सहभागिता सुनिश्चित गर्ने निर्णय समेत गरेको छ  । यसैगरी, बैठकले स्थानीय व्यवस्थापनलाई पनि मार्गनिर्देशन दिएको सदस्य सेवा कार्यालय इन्चार्ज विष्णु जोशीले बताउनुभयो ।