काठमाडौं । नेफ्स्कून तथा जिल्ला बचत तथा ऋण सहकारी संघ लि. मोरङबीचको साझेदारी कार्यक्रम अन्तर्गत सञ्चालित जोखिममा आधारित साकोस सुपरिवेक्षण (कर्ब्स) कार्यक्रममा २ वटा साकोस थपिएका छन् । बचत संघ मोरङका दुई सदस्य संस्था उर्लाबारी साकोस, उर्लाबारी र न्यू जनएकता साकोस बेलबारी कर्ब्स कार्यक्रममा आवद्ध भएका हुन् । दुबै साकोसका तर्फबाट कर्ब्स कार्यक्रममा हस्ताक्षर गरिएको जिल्ला बचत संघ मोरङले जनाएको छ । यो सँगै मोरङमा कर्ब्समा आवद्ध साकोसहरुको संख्या ३५ पुगेको छ । यो आर्थिक वर्षमा हालसम्म  ४ वटा साकोस थपिएका हुन् । 

जिल्ला बचत सङ्घको सञ्चालक समिति र लेखा सुपरिवेक्षण समितिमा प्रतिनिधित्व गर्ने सदस्य संस्थाहरु कुनै एक स्तरीकरण कार्यक्रममा आवद्ध हुनुपर्ने निर्णय बमोजिम सञ्चालक गोपालकुमार घिमिरेले प्रतिनिधित्व गरेको उर्लाबारी साकोस कर्ब्स कार्यक्रममा आवद्ध भएको हो ।

सम्झौता पत्रमा संघका व्यवस्थापक केदारनाथ दुलाल, कार्यक्रम अधिकृत रामकुमार दाहाल र संस्थाका अध्यक्ष एवम् सङ्घका सञ्चालक गोपालकुमार घिमिरे र व्यवस्थापक महेन्द्र दाहाल लगायत संस्थाका पदाधिकारीहरुले हस्ताक्षर गर्नुभएको थियो ।

त्यसैगरी, बेलबारी नगरपालिका अन्तर्गत सबैभन्दा बढी सदस्य संख्या भएको न्यू जनएकता साकोस पनि जोखिममा आधारित साकोस सुपरिवेक्षण कार्यक्रममा आवद्ध भएको हो । उक्त साकोसको कुल सदस्य संख्या हाल ३,२४३ छ । कर्ब्स सम्झौता पत्रमा जिल्ला संघका व्यवस्थापक केदारनाथ दुलाल, कार्यक्रम अधिकृत रामकुमार दाहाल र संस्थाका अध्यक्ष नरेन्द्र बस्नेत र व्यवस्थापक बिनय मिश्रले हस्ताक्षर गर्नुभएको थियो ।

बचत संघका २६२ सदस्य संस्थामध्ये नेफ्स्कूनले एशियाली ऋण महासंघ (अकू) सँगको प्राविधिक सहयोग र सहकार्यमा सञ्चालन गरेको एक्सेस स्तरीकरण कार्यक्रममा १२ वटा, नेपाल सरकार सहकारी विभागसँगको सहकार्यमा सञ्चालित प्रोवेशन कार्यक्रममा ११ वटा र कर्ब्समा ३५ गरी कुल ५८ साकोसले गुणस्तर सुनिश्चितता कार्यक्रममा आवद्धता जनाएका छन् । संघका २२.१३ प्रतिशत सदस्य संस्था कुनै कुनै एक गुणस्तर सुनिश्चितता कार्यक्रममा आवद्ध भएको जनाइएको छ ।