महाराष्ट । अन्तर्राष्ट्रिय सहकारी वर्ष २०२५ को अवसरमा एशियाली ऋण महासंघको सदस्य संगठन महाराष्ट्र बचत ऋण सहकारी संघले अन्तर्राष्ट्रिय सहकारी सम्मेलन २०२५ को भव्य आयोजना गरेको छ । दुई दिवसीय सम्मेलनको पहिलो दिन युवा, महिला, सुशासन र कानूनी कार्यढाँचाका विषयमा सहकारी नियमनकारी र संघहरुका करिब २ सय उच्च पदस्थ अधिकारीहरुको सहभागितामा कार्यशाला गोष्ठी आयोजना गरिएको थियो ।

यसैगरी, दोश्रो दिन करिब ७ हजार सहकारीकर्मीहरुबीच बचत तथा ऋण सहकारी सम्बन्धी समसामयिक विषयहरुमा छलफल भएको छ । सम्मेलनको उद्घाटनमा राजस्थानका राज्यपालको हरिबाहु बगाडेको प्रमुख आतिथ्यता, महाराष्ट्रका सहकारी मन्त्री गौतम कुमार, एशियाली ऋण महासंघका प्रमुख प्राविधिक अधिकृत रजिञ्त हिताराची, कर्नाटकका सहकारी संघका अध्यक्षसँगै  नेपाल, फिलिपिन्स, श्रीलंका, मोरिसस्, थाईल्याण्डका अन्तर्राष्ट्रिय अतिथिहरुको उपस्थिति रहेको थियो । 

सम्मेलनमा नेपालका तर्फबाट नेफ्स्कूनका अध्यक्ष चन्द्र प्रसाद ढकाल र प्रमुख कार्यकारी अधिकृत डा. शिवजी सापकोटाले आतिथ्यता जनाउनु भएको थियो । अतिथिहरु बीच नेपालका बचत तथा ऋण सहकारीहरु मार्फत व्यवसाय विकास प्रवर्धन गर्न र रोजगारी सृजना गर्न भारत र नेपाल बीच नयाँ सहकार्य अघि बढाउने विषयमा छलफल भएको छ । यससम्बन्धी सहजीकरण एशियाली ऋण महासंघले गर्ने जनाइएको छ ।