काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्रप्रसाद ढकाल एवम् प्रमुख कार्यकारी अधिकृत डा. शिवजी सापकोटाले आज भारतीय राष्ट्रिय सहकारी संघ लि.(एनसीयूआई) का प्रमुख कार्यकारी अधिकृत डा. सुधिर महाजन तथा नयाँ दिल्लीस्थित सहकारी बैंक तथा क्रेडिट सोसाइटीहरुको शीर्ष संघ नाफ्कूबका प्रमुख कार्यकारी अधिकृत (सिईओ) योगेश शर्मासँग भेटवार्ता गर्नुभएको छ ।

भारत भ्रमणमा रहनुभएका नेफ्स्कून अध्यक्ष ढकाल तथा सिईओ डा. सापकोटाले हिजोबाटै उच्चस्तरीय भेटघाट तथा छलफल सुरु गर्नुभएको छ । आजको भेटवार्ता पनि नेफ्स्कून र भारतीय सहकारीका शीर्ष निकायहरुबीच सम्बन्धलाई बलियो बनाउने दिशामा केन्द्रीत रहेको थियो । 

दुबै निकायका केन्द्रीय कार्यालयमा भएको भेटवार्तामा पनि नेफ्स्कूनको क्षमता विकासमा सहयोग पुर्याउने, साकोस अभियानका व्यवस्थापकहरुको सक्षमता विकासमा सहयोग पुर्याउने, दुईतर्फ अवलोकन भ्रमणको वातावरण तयार पार्ने, असल अभ्यासहरु आदानप्रदान गर्ने तथा सहकारीमार्फत उत्पादन, बजारीकरण र प्रवर्धनका दिशामा नवीन सम्भावनाहरु पहिचान गर्ने विषयमा महत्वपूर्ण छलफल भएको छ । 

दिल्लीको कार्यक्रम पछि नेफ्स्कून अध्यक्ष ढकाल तथा सिईओ डा. सापकोटा छिमेकी महाराष्ट्र फेडेरेशन अफ कोअपरेटिभ सोसाइटीको आयोजना फेब्रुअरी ८ र ९ मा हुने सहकारी सम्मेलनमा बिशिष्ट अतिथिको रुपमा समेत सहभागी हुनुहुनेछ भने त्यहाँ पनि साइडलाइन छलफलको कार्यक्रम रहेको सिईओ डा. सापकोटाले बताउनुभयो ।