काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) र सुरक्षित कारोबार दर्ता कार्यालयका प्रतिनिधिहरुबीच चल सम्पत्ति दर्ता गरि ऋण लेनदेन प्रक्रिया लागु गर्न सकिने सम्बन्धमा प्रारम्भिक छलफल भएको छ । आज संघको केन्द्रीय कार्यालयमा आयोजित छलफल कार्यक्रममा संघका प्रमुख कार्यकारी अधिकृत डा. शिवजी सापकोटा लगायतको व्यवस्थापक टीम र  सुरक्षित कारोबार दर्ता कार्यालयका प्रतिनिधिहरुबीच पहिलो चरणको छलफल भएको हो ।

कर्जा सुचना केन्द्र लिमिटेड मार्फत सञ्चालनमा रहेको उक्त कार्यालयले सुरक्षित करोबार प्रणाली लागु गरि चल सम्पत्तिमा लिएको ऋण दर्ता हुने जसमा बैंक वित्तिय संस्था, सहकारी र व्यक्ति मार्फत गरिने कर्जा लगानीलाई समेत मान्यता दिइने गरि नेपालमा पहिलो पटक कार्यालयले काम शुरु गरेको कार्यालयका कानुनी सल्लाहकार सहदेव खत्रीले जानकारी गराउनुभयो ।   
संघसँगको प्रारम्भिक छलफल पछि संघका प्रमुख कार्यकारी अधिकृत डा.सापकोटाले संघमा आबद्ध सदस्य संघ संस्थाहरुलाई सुरक्षित कारोबार प्रणाली अन्तर्गत चल सम्पत्तिमा लिएको ऋण दर्ता गर्ने प्रक्रिया सम्बन्धमा अनुशिक्षण दिइने बताउनुभयो । 

सुरक्षित कारोबार ऐन, २०६३ को प्रभावकारी कार्यान्वयनको चरणमा सुरक्षित कारोबार दर्ता कार्यालयको काम अगाडि बढेको हो । यो प्रणाली लागु भएपछि चल सम्पत्तिको धितोमा दिइने ऋण दर्ता हुनेछ र एउटै धितो राखेर एकभन्दा बढि ऋणदाताबाट खाम्नेभन्दा बढि ऋण लिने अवस्थाको अन्त्य हुने कर्जा सूचना केन्द्र लिमिटेडका सहायक व्यवस्थापक नगेन्द्र महर्जनले जानकारी गराउनुभयो ।