सुनसरी । बर्जु गाउँपालिका –५, सुनसरीस्थित प्रगति बचत तथा ऋण सहकारी संस्था लिमिटेडले कक्षा ११ र १२ मा अध्ययनरत विद्यार्थीहरुका लागि वित्तीय शिक्षा प्रदान गरेको छ । श्री नेपाल राष्ट्रिय माध्यामिक विद्याालय आमाही वेलहामा मा अध्ययनरत ६० जना विद्यार्थीहरुका लागि साकोसले फागुन २१ गते बुधबार वित्तीय साक्षरता तथा सचेतना कार्यक्रम सञ्चालन गरेको हो । 

प्रगति साकोसका प्रमुख कार्यकारी अधिकृत उमेश चौधरी र व्यवस्थापक श्रवण चौधरीले विद्यार्थीहरुका लागि वित्तीय शिक्षा तथा सचेतना सम्बन्धी कार्यक्रममा प्रशिक्षण गर्नुभएको थियो । साकोसले यसअघि फागुन १० गते बर्जु गाउँपालिका–२ मा अवस्थित रामसिता माध्यामिक विद्यालयका ८१ जना छात्र छात्राहरुलाई पनि वित्तीय साक्षरता कक्षा सञ्चालन गरेको थियो । वित्तीय साक्षरता कक्षाले भविष्यको योजना बनाउने उमेरका विद्यार्थीहरुमा जीवनमा वित्तीय शिक्षाको आवश्यकता, बचतको महत्व, सहकारी शिक्षा, वित्तीय कर्जा सम्बन्धी विषयहरुमा महत्वपूर्ण ज्ञान दिने उद्देश्य रहेको साकोसका प्रमुख कार्यकारी अधिकृत उमेश चौधरीले जानकारी गराउनुभयो । 
 
प्रगति साकोस नेफ्स्कूनद्वारा सञ्चालित अन्तर्राष्ट्रिय स्तरको गुणस्तर सुनिश्चितताको कार्यक्रम एक्सेसमा आवद्ध सदस्य संस्था हो । समुदायस्तरमा सञ्चालित प्रगति साकोसले हाल कुल २ हजार ९ सय २७ सदस्यहरुलाई वित्तीय सेवा प्रदान गरेको छ भने कुल २२ करोड ६५ लाखको वित्तीय कारोबार गर्न सफल भएको छ । स्वस्थ संस्थागत वित्तीय सूचक कायम रहेको उक्त साकोसको २६ प्रतिशत जगेडा कोष रहेको छ ।