काठमाडौं । सहयात्री बचत तथा ऋण सहकारी संस्था लिमिटेड गुणस्तर सुनिश्चितता सम्बन्धी प्रोबेसन कार्यक्रममा आवद्ध भएको छ । आज विहान संस्थामा आयोजित एक कार्यक्रमबिच सम्झौता पत्रमा हस्ताक्षर भएको हो । सहयात्री  साकोसको प्रनिधित्व गदै नेफ्स्कूनको सञ्चालक समिति सदस्यमा रहनुभएका खेम सुवेदी साकोसको अध्यक्ष हुनुहुन्छ ।

 
नेफ्स्कूनलाई प्राविधिक परामर्श प्रदान गर्न गत केही दिनदेखि निरन्तर नेफ्स्कूनसँगको कार्यक्रममा रहनुभएका एशियाली ऋण महासंघका सिइओ लेनी र प्रमुख प्राविधिक अधिकृत रञ्जित हिताराची सहित संघका बरिष्ठ उपाध्यक्ष दामोदर अधिकारी, प्रमुख कार्यकारी अधिकृत डा.शिवजी सापाकोटा, नेफ्स्कूनका सञ्चालक एवं साकोसका अध्यक्ष खेम सुवदी, संघका विभागीय प्रमुख दुर्गा प्रसाद ढकाल, बरिष्ठ कार्यक्रम अधिकृत भरत न्यौपाने, साकोसका व्यवस्थापक जुना डाँगी सहित साकोस व्यवस्थापन कर्मचारीहरुको उपस्थितिकाबिच कार्यक्रम सम्झौता भएको थियो ।

क्वालिटी एसुरेन्स कार्यक्रम मार्फत साकोसको बृद्धि विकास गरि सबल र दिगो साकोस अभियान निर्माणका लागि नेफ्स्कूनको बोर्ड प्रतिनिधित्व गर्ने सम्पूर्ण सञ्चालक आबद्ध साकोसलाई अनिवार्य रुपमा कार्यक्रममा जोडिन बोर्ड परामर्श बैठकका अवसरमा बुधबार अकू प्राविधिक टीमले विशेष अनुरोध समेत गरेको थियो ।  

अकूकी सिइओ लेनीले प्रोवेसन स्तरको क्वालिटी एसुरेन्स कार्यक्रममा जोडिएर बलियो साकोस निर्माणको काममा अगाडि बढेको प्रति खुसी व्यक्त गर्दै साकोस र सम्पूर्ण सञ्चालक तथा कर्मचारी परिवारमा बधाई ज्ञापन गर्नुभएको थियो । 

पहिलोपटक साकोसको भिजिटमा पुग्नुभएका अकूका सिईओ र प्रमुख प्राविधिक अधिकृतलाई अध्यक्ष सुवेदी र कर्मचारीहरुले स्वागत तथा सम्मानभाव प्रकट गर्नुभएको थियो । 

नियमित अनुगमन तथा सुपरिवेक्षणमार्फत संस्थाको वित्तीय स्वास्थ्य सबल बनाउँदै संस्थागत विकास गर्न प्रोबेसन कार्यक्रममा सहभागी भएको अध्यक्ष सुवेदीले जानकारी गराउनुभयो । करिब ३५ करोडको कुल कारोबार गरिरहेको साकोसले ४ हजार ४ सय २० भन्दा बढी सदस्यहरुमा वित्तीय सेवा उपलब्ध गराईरहेको छ ।