दोलखा । जिरीमा सञ्चालित एकीकृत फ्रेण्डसिप बचत तथा ऋण सहकरी संस्था लिमिटेडले ३३औं स्थापना दिवस आईतबार भव्य समारोहकाबिच सम्पन्न गरेको छ । साकोसका अध्यक्ष भूमिराज खड्काको अध्यक्षतामा आयोजित कार्यक्रममा नेफ्स्कूनका पूर्व अध्यक्ष एवं राष्ट्रिय सहकारी महासंघका उपाध्यक्ष डि.बी. बस्नेतको प्रमुख आतिथ्यता रहेको थियो ।

विशिष्ट आतिथिहरुमा जिल्ला समन्वय समिति दोलखाका उपाध्यक्ष दोर्जी शेर्पा, जिरी नगरपालिका उपप्रमुख कृष्णमाया बुढाथोकी, जिल्ला सहकारी संघ दोलखाका अध्यक्ष देवीप्रसाद शर्मा फुयाल, दोलखा जिल्ला बचत संघका कोषाध्यक्ष पर्शुराम कार्की हुनुहुन्थ्यो । 

कार्यक्रममा जिल्ला सहकारी संघ दोलखाका महासचिव दिलबहादुर के.सी. लगायत विभिन्न सहकारीका अध्यक्ष, पदाधिकारी, प्रतिनिधि, जिरी न.पा का वडाअध्यक्षहरु, विभिन्न वित्तीय तथा विद्यालय, संघसंस्थाका प्रतिनिधिहरु, सल्लाहकारहरुरुको आतिथ्यता थियो ।

संस्थाका प्रमुख कार्यकारी अधिकृत रामकृष्ण रायक्षेत्रीले सञ्चालन गरेको कार्यक्रममा संस्थाको विगतदेखि वर्तमानसम्मको अवस्था र संस्थाले सञ्चालन गरेका विभिन्न क्रियाकलापहरुको बारेमा नायव प्रमुख कार्यकारी अधिकृत रामबहादुर खत्रीले प्रस्तुतीकरण गर्नुभएको थियो ।

स्थापना दिवसको अवसर पारेर फागुन २८ गते आयोजित अन्तर माध्यामिक विद्यालयस्तरीय सहकारी निबन्ध लेखन प्रतियोगिता आयोजना गरेको थियो । उक्त प्रतियोगितामा चण्डेश्वरी मा.वि., उमाकुण्ड–४, प्रितिका आकाश सुनुवार प्रथम भएका थिए । त्यस्तै शारदा मा.वि., गोकुलगंगा–२, ठोसेकी रिया बस्नेत द्धितिय भएकी थिईन । जिरी मा.वि., जिरी–६ का मिन्टु शेर्पा तृतिय भएका थिए भने कास्थेम मा.वि., उमाकुण्ड–७, भुजीकी लक्ष्मी थापाले सान्त्वना स्थान हासिल गरेकी थिईन । विजेताहरुलाई समारोहमा नगदसहित पुरस्कार प्रदान गरिएको थियो ।

समारोहमा आ.व. २०८०/०८१ मा उत्कृष्ट नियमित बचतकर्ता, उत्कृष्ट बाल बचतकर्ता, उत्कृष्ट कारोबारकर्ता, असल ऋणी, उच्चतम् प्रविधि प्रयोगकर्ता, उच्चतम शेयर खरिदकर्ता, उत्कृष्ट सुझावकर्ता जस्ता विभिन्न विधामा उत्कृष्टता हासिल गर्ने सदस्यहरुलाई सम्मान गरिएको थियो । त्यस्तै उत्कृष्ट कार्यसम्पादन गर्ने कर्मचारी मानबहादुर जिरेललाई पुरस्कृत समेत गरिएको थियो ।

संस्थाका कोषाध्यक्ष उद्धवकुमार कार्कीले स्वागतमन्तव्य, सल्लाहकार ईन्द्रबहादुर खड्काले सल्लाहकारको मन्तव्य र चारैजना विशिष्ट अतिथिहरुले सहकारीका विविध आयाममा चर्चा गर्दै संस्थाको स्थापना दिवसको शुभकामना मन्तव्य राख्नुभएको थियो । 

कार्यक्रमका प्रमुख अतिथि बस्नेतले संस्था स्थापनाकालमा संस्थापक अध्यक्ष स्व. गोकुलध्वज कार्कीसँगको सहकार्य स्मरण गर्दै संस्था दोलखा जिल्लाको सहकारी अभियानमा अग्रपंक्तिमा उभिन र सदस्यहरुलाई गुणस्तरीय सेवा दिन सफल भएकोमा गर्व अनुभव भएको भनाईसहित शुभकामना मन्तव्य राख्नुभएको थियो ।

कार्यक्रमका सभाध्यक्ष खड्काले धन्यवाद ज्ञापन गर्नुभएको थियो । स्थापना दिवसकै अवसर पारेर एम बैंकसँगको सहकार्यमा साकोसले सञ्चालन गरिरहेको मोबाईल एपमा क्युआर भुक्तानी अन्तर्गत नेपाल पे क्यूआर र स्मार्ट क्यूआर थप गरिएको थियो भने मिस्डकल बैकिंङ सेवा शुभारम्भ गरिएको थियो ।