काठमाडौं । ‘मर्यादित सहकारीः समुन्नत समाज’ को थिमलाई आत्मसाथ गर्दै ६८औं राष्ट्रिय सहकारी दिवस तथा अन्तर्राष्ट्रिय सहकारी वर्ष २०२५ भव्य रुपमा मनाउन भूमि व्यवस्था, सहकारी तथा गरिबी निवारण मन्त्रालय, सहकारी विभाग, मुल समारोह समितिले सम्पूर्ण सहकारी अभियानकर्मीहरुमा हार्दिक निमन्त्रणा गरेको छ ।  भूमि व्यवस्था, सहकारी तथा गरिबी निवारण मन्त्रालय र सहकारी अभियानको संयुक्त आयोजनामा चैत्र २० गते राष्ट्रिय सभा गृहमा ६८औं राष्ट्रिय सहकारी दिवस तथा अन्तर्राष्ट्रिय सहकारी वर्ष २०२५ को भव्य कार्यक्रम तय भएको हो ।

राष्ट्रिय सहकारी दिवस एवम् अन्तराष्ट्रिय सहकारी वर्ष मनाउन १५१ सदस्यीय मूल समारोह समिति गठन गरिएको छ भने २५ सदस्यीय कार्य व्यवस्थापन समिति समेत गठन गरिएको छ । कार्य व्यवस्थापन समितिको संयोजकमा रजिस्ट्रार उमेश ढुंगाना हुनुहुन्छ । आइतबार कार्य व्यवस्थापन समितिको पहिलो बैठक समेत बसेको थियो ।

समारोहमा गरिने मुख्य कार्यक्रम सहकारी गानको सार्वजनिकीकरण, सहकरी वर्ष लोगो अनावरण, पुरस्कार घोषणा, साँस्कृतिक कार्यक्रम, थीम सार्वजनिकीकरण लगायतका गतिविधि सम्बन्धमा बैठकले निर्णय गरेको छ ।

बैठकमा मन्त्रालय, विभाग, महासंघका सञ्चालक, नेफ्स्कूनका प्रतिनिधि, विषगत केन्द्रीय संघका प्रतिनिधि, प्रदेश र जिल्ला तहका संघहरुका प्रमुखहरुको उपस्थिति थियो । बैठकले देश भर मर्यादित सहकारीः समुन्नत समाज थीममा देशव्यापी रूपमा दिवस मनाउन सहजीकरण गर्ने तय गरेको छ । 

व्यवस्थापन समितिका सहसंयोजकमा महासंघका वरिष्ठ उपाध्यक्ष रमेश प्रसाद पोखरेल र सदस्य सचिवमा महाप्रबन्धक सुरेश थापा रहेका छन् ।