काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजनामा वैशाख २५ गते, दुर्गा पार्टी प्यालेसको नयाँ सेमिनार हल आइतबारे, इटहरीमा हुने कोशी प्रदेशस्तरीय साकोस गोष्ठीको सम्पूर्ण तयारी पुरा भएको छ । संघले अन्तर्राष्ट्रिय सहकारी वर्ष २०२५ को अवसरमा प्रदेशस्तरीय साकोस गोष्ठीको आयोजना गरेको हो । यही बैशाख २५, २८ र ३१ गते क्रमशः तीनदिन कोशी प्रदेश, मधेश प्रदेश र लुम्बिनी (सूदुरपश्चिम र कर्णाली सहित) प्रदेशमा आयोजना हुने साकोस गोष्ठीको तयारी तीब्रतर भईरहेको छ भने कोशी प्रदेशको तयारी पुरा भएको छ ।

कोशी प्रदेशस्तरीय साकोस गोष्ठीको उद्घाटन कोशी प्रदेशका उद्योग कृषि तथा सहकारी मन्त्री खगेनसिं हाङगामको प्रमुख आतिथ्यतामा हुनेछ । गोष्ठी सहभागिताका लागि अतिथि र सम्बन्धित सरोकारवालाहरुका लागि पत्राचार समेत गरिसकिएको र कोशी  प्रदेशस्तरीय गोष्ठीमा मात्र विभिन्न सहकारी संघ संस्थाबाट आजसम्म १७० जनाको सहभागिता सुनिश्चित भएको संघले जनाएको छ । त्यसैगरि अन्य प्रदेशहरुमा पनि गोष्ठीको तयारी समानान्तर रुपमा भईरहेको संघको भनाई छ । 

एक दिवसीय उक्त गोष्ठीको पहिलो सत्र, ‘साकोस अभियानको प्रवर्द्धन र हितका लागि आगामी कार्यदिशा’ विषयमा नेफ्स्कूनका सिईओ डा.शिवजी सापकोटाले कार्यपत्र प्रस्तुत गर्नुहुनेछ । 

त्यसैगरी दोस्रो सत्रमा ‘सुशासन र आन्तरिक नियन्त्रण प्रणाली प्रवर्द्धनमा लेखा सुपरिवेक्षण समितिको भूमिका’का विषयमा चार्टर्ड एकाउण्टेन्ट् (सिए) राजन अधिकारीको प्रस्तुती रहनेछ भने ‘बचत तथा ऋण सहकारीको संस्थागत विकासमा सरकार र अभियानको साझा सवाल’ विषयमा राष्ट्रिय सहकारी नियमन प्राधिकरणका सचिव एवं प्रवक्ता रविन ढकालको कार्यपत्र प्रस्तुत हुनेछ ।
त्यसैगरी बैशाख २८ गते बर्दिबास महोत्तरी र ३१ गते नेपालगञ्जमा हुने साकोस गोष्ठीमा पनि साकोस अभियानको प्रवर्द्धन र हितका लागि आगामी कार्यदिशा, सुशासन र आन्तरिक नियन्त्रण प्रणाली प्रवर्धनमा लेखा सुपरिवेक्षण समितिको भूमिका र बचत ऋण सहकारीको संस्थागत विकासमा सरकार र अभियानको साझा सवाल विषयक कार्यपत्र प्रस्तुत हुनेछन् ।

वित्तीय सुशासन, जोखिम व्यवस्थापन र संस्थागत दिगोपनका लागि संघद्वारा आयोजित प्रदेशस्तरीय गोष्ठीले सहकारीको पहिचान प्रवर्द्धन, नेतृत्वलाई उत्प्रेरणा र दिगो विकास लक्ष्य प्राप्तीका लागि सहकारीहरुलाई सचेत गराउने लक्ष्य लिएको जनाइएको छ । साथै नेपालको सहकारी अभियानको विद्यमान कानुनका द्विविधा समस्या समाधानको रूपमा गोष्ठीले बाटो पहिल्याउने संघको अपेक्षा रहेको छ ।

गोष्ठीमा सहकारी संस्थाका लेखा सुपरिवेक्षण समिति, व्यवस्थापक तथा सञ्चालक र सरोकारवाला व्यक्तिहरुको सहभागिता रहनेछ । हरेक वर्ष केन्द्रीयस्तरमा राष्ट्रिय गोष्ठी आयोजना गर्दैआएको संघले यो वर्ष प्रदेशस्तरीय गोष्ठी आयोजना गरेको हो । संघले प्रत्येक गोष्ठीमा दुई सय जनाको मात्र सहभागिता गराउने जनाएको छ ।