नेपालगञ्ज । भूमि व्यवस्था सहकारी तथा गरिबी निवारण मन्त्री बलराम अधिकारीले राष्ट्रिय सहकारी नियमन प्राधिकरणले जेठको पहिलो साताभित्र निर्देशन जारी गर्ने बताउनुभएको छ । नेपाल बचत तथा ऋण केन्द्रीय सहकारी संघ लि.(नेफ्स्कून) द्वारा बुधबार नेपालगञ्जमा आयोजित प्रदेशस्तरीय साकोस गोष्ठी उद्घाटन सत्रलाई सम्बोधन गर्ने क्रममा मन्त्री अधिकारीले जेठको पहिलो साताभित्रै निर्देशन जारी हुने र प्राधिकरणले सहकारी नियमनको काम शुरु गर्ने बताउनुभएको हो । “नेपाल राष्ट्र बैंकले सम्बन्धित मन्त्रालयसँग समन्वय नै नगरी मापदण्ड जारी गर्ने काम गर्यो, त्यो विषयमा मैले राष्ट्र बैंकलाई जानकारी समेत गराईसकेको छु , सहकारीको नियमन राष्ट्र बैंकले होइन राष्ट्रिय सहकारी नियमन प्राधिकरणले गर्ने हो, त्यसमा सहकारीकर्मीहरु कत्तिपनि आत्तिनुपर्दैन ।” उहाँले भन्नुभयो ।

सहकारीभित्रका अनियमितताका विषयलाई नियमनमा ल्याएर विधिसम्मत रुपले सञ्चालन गर्न गराउन अव प्राधिकरण मार्फत काम शुरु हुने उहाँको भनाई  थियो । मन्त्री अधिकारीले सहकारी नियम, विधिको आधारमा चलेनन् र आफ्नै मनोपोली विकास हुँदा अनियमितता बढेको विचार व्यक्त गर्नुभएको थियो । सहकारीलाई विधिसम्मत रुपले सञ्चालन गर्ने भन्नेमा हाम्रो ध्यान छ । सहकारी राम्रा छन्, एकादुई सहकारीले गलत गरेको आधारमा सहकारी गलत छन् भन्ने भाष्य उत्पन्न गरिएको छ, यसको अन्त्य गर्नुपर्छ, त्यसका लागि तपाई हामी जागरुक हुन जरुरी छ । अब हामीले गाउँ गाउँमा सहकारी सफल रुपमा सञ्चालन भईरहेका छन् भन्ने कुराको उदाहरण देखाएर पुष्टि गर्नुपर्ने समय भएको छ, उहाँले भन्नुभयो ।

मन्त्री अधिकारीले सहकारी अध्यादेश ल्याउने क्रममा सामान्य कमजोरी भएको, केही विषयहरु छुटेको कुरा राख्दै अभियानको मर्म बमोजिम अझै पनि सुधार गरेर जान सकिने र आवश्यकता परेमा ऐन नै पनि परिवर्तन गर्न सकिने बताउनुभयो ।

मन्त्री अधिकारीले सहकारी चाहिन्न भन्ने केही व्यक्तिका कारण सबै सहकारीहरु गलत हुन भन्ने भाष्य निर्माण गर्न खोजिएको बताउनुभयो । निम्न बर्गसम्म वित्तीय सेवा पुर्याउन सहकारी बाहेक अर्को विकल्प नरहेको भन्दै सहकारीको विकास, प्रवर्द्धन र संरक्षणमा सरकारसँगै हातेमालो गरेर अगाडि बढ्न अभियानलाई अनुरोध गर्नुभयो । सहकारीलाई राम्रो बनाउने उद्देश्यका साथ सरकार अगाडि बढेको छ, यसमा गलत गर्नेलाई कारबाही र राम्रोलाई प्रोत्साहन गर्ने काम हुन्छ, उहाँले भन्नुभयो । यसकारण सहकारी प्रवर्दनमा सरकार संगै अभियानले पनि हातेमालो गरौं । गलत लाई कार्वाही  र राम्रालाई प्रोत्साहन सरकाले गर्छ ।