कास्की । पोखरा रोयल बचत तथा ऋण सहकारी संस्था लि. ले २३ बर्षे यात्रा सफलताका साथ पुरा गरी जेठ ८ गतेबाट २४ औं बर्षमा प्रवेश गरेको छ । संस्थागत सबलता, वित्तीय सुशासन र प्रविधिमैत्री सहकारीको पहिचान सहित दुई दशक भन्दा बढी यात्रा पार गरेको साकोसको अबको परिकल्पना नै “सुखी सदस्य र दिगो सहकारी” निर्माणको सफलता रहेको छ ।

‘सुखी सदस्य, दिगो सहकारी’को परिकल्पनाका साथ सदस्य सेवामा समर्पित पोखरा रोयल सदस्यमैत्री, प्रविधिमैत्री, विश्वसनीय, सुरक्षित अनि पारदर्शी सेवालाई जोड दिएको छ । स्थापना दिवसको अवसरमा संस्थाका अध्यक्ष रुद्र कुमारी गुरुङ्ग (मैना) र प्रमुख कार्यकारी अधिकृत भीम बहादुर गुरुङ्गले संयुक्त रुपमा सम्पूर्ण सेयर सदस्यहरु र शुभचिन्तकहरुमा शुभकामना व्यक्त गर्नुभएको छ । सुखी सदस्य र दिगो सहकारी बनाउने परिकल्पनाका साथ अघि बढेको पोखरा रोयलले सहकारी क्षेत्रमा एउटा नेतृत्वदायी संस्थाको रुपमा पहिचान स्थापित गर्दै सदस्यलाई सुखी बनाउने प्रण गरेको छ ।

साकोसको वित्तीय अवस्था

२०८२ बैशाख मसान्तको वित्तीय विवरणअनुसार हाल संस्थामा १० हजार २ सय १८ जना सदस्य छन् । संस्थाको कुल सम्पत्ति २ अर्ब ५८ करोड बढी छ । १५ करोड ३० लाख बढी शेयर पुँजी रहेको साकोससँग २१ करोड ३० लाख बढी संस्थागत पुँजी छ । 

२ अर्ब ५९ लाख बढी बचत रहेको साकोसले १ अर्ब ६८ करोड बढी ऋण लगानी गरेको छ । तरलता ३८.७२ प्रतिशत छ ।

परिवर्तित समयपरिवेश र सदस्यहरुको मागलाई सम्बोधन गर्दै साकोसले प्रविधिमैत्री वित्तीय सेवामा जोड दिँदै आएको छ । साकोसले एटिएम सेवा, मोबाईल बैंकिङ, क्यूआर कोड, एसएमएस बैंकिङ लगायतका सेवा विस्तार गरेको छ ।