सिन्धुली । कमलामाई नगरपालिकाको साझेदारी र नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजनामा माढी बजार सिन्धुलीमा सहकारी व्यवस्थापनमा जोखिम विश्लेषण तथा सम्पत्ति शुद्धिकरणसम्बन्धी अभिमुखिकरण सम्पन्न भएको छ । शनिबार आयोजित अभिमुखिकरण कार्यक्रममा सहकारी संस्थाका कम्पलायन्स् अफिसर र पदाधिकारीहरु सहित  ३४ जनाको सहिभागिता रहेको थियो । सहकारी विभागका अधिकृत तिलकराम पोख्रेलको सहजीकरणमा सम्पन्न कार्यकममा सहभागीहरूलाई सम्पत्ति शुद्धिकरणको कानुनी पालनाका साथै सहकारी संस्थामा देखिने सम्भावित जोखिम, त्यसको विश्लेषण, निवारणका उपाय बारेमा विस्तृत जानकारी दिइएको थियो ।

कार्यक्रममा जिल्ला सहकारी संघका अध्यक्ष नवराज कोइराला, कमलामाई नगरपालिका भूमि व्यवस्था तथा सहकारी इकाई प्रमुख मुकेश तामाङ ,नेफ्स्कून सिन्धुली सेवा केन्द्रका कर्मचारी अस्मिता दाहाल लगायतको उपस्थिति रहेको थियो । 

नगरपालिकाका सहकारी इकाई प्रमुख मुकेश तामाङले स्वागत मन्तव्य व्यक्त गर्दै तामिमको उद्देश्य तथा औचित्यताबारे प्रष्ट पार्नुभएको थियो । उहाँले सहकारी क्षेत्रको दिगो विकासका लागि जोखिम व्यवस्थापन र पारदर्शिताको आवश्यकता औल्याउँदै सहकारी संस्थाहरूले जोखिम कम गर्ने रणनीति अवलम्बन गर्दै सम्पत्ति शुद्धिकरणविरुद्धको राष्ट्रिय र अन्तर्राष्ट्रिय प्रतिबद्धतालाई आत्मसात् गर्नुपर्नेमा जोड दिनुभएको थियो । 

कार्यक्रमको समग्र व्यवस्थापन र कार्यक्रम सञ्चालन नेफ्स्कून सिन्धुली सेवा केन्द्रका प्रमुख  श्याम बुढाथोकीले गर्नुभएको थियो ।

सहभागीहरुले सम्पत्ति शुद्धिकरण सम्बन्धी कार्यक्रममा आफुहरुले पहिलो पटक सहभागी हुने अवसर पाएकोमा खुसी व्यक्त गर्दै अभिमुखिकरण कार्यक्रमबाट सिकेका कुराहरुलाई संस्थामा कार्यान्वयन गर्ने प्रतिबद्धता व्यक्त गर्नुभएको थियो ।