रुपन्देही । प्रयास बचत तथा ऋण सहकारी संस्था लि., बुटवल १२ रुपन्देहीले खुल्ला रक्तदान कार्यक्रम गरेको छ । संस्थाको १८औं स्थापना दिवसको पूर्व सन्ध्यामा आयोजित रक्तदान कार्यक्रममा सहभागी रक्तदाताहरुबाट ७३ युनिट रगत संकलन भएको छ । साकोसले आफ्नो मध्यकालीन रणनीतिक योजनामा समेटिएको सामाजिक उत्तरदायित्वपूर्ण कार्यक्रम अन्तर्गत मानवीय सहयोगका लागि रक्तदान कार्यक्रम आयोजना गरिएको जनाएको छ । 

चारपाला पुर्व सैनिक कल्याणकारी क्लबको सभाहल, तामनगरमा आयोजित रक्तदान कार्यक्रममा प्राविधिक सहयोग रक्तसञ्चार सेवा गृह बुटवलले गरेको थियो ।

कार्यक्रममा साकोसका अध्यक्ष भिम बहादुर थापाले प्रयास साकोस सधै समुदायमा समर्पित रहदै आएको, आफ्ना वित्तीय गतिविधिमा मात्र सिमित नरही निरन्तर समाज केन्द्रित गतिविधि संचालन गरिरहेको बताउनुभयो । रगतको अभावमा अकालमा ज्यान गुमाउनु पर्ने परिस्थितिको अन्त्य हुनुपर्ने भन्दै प्रयास साकोसले यस्ता गतिविधि निरन्तर रूपमा आयोजना गर्ने योजना रहेको उहाँको भनाई थियो । 

कार्यक्रमका प्रमुख अतिथि सुर्य बहादुर रानाले आफ्ना समाजोपयोगी पृथक गतिविधिको कारण प्रयास सहकारीले समाजमा अलग्गै स्थान बनाएकोमा प्रशंसा गर्नुभयो । कार्यक्रममा साकोसका सल्लाहकारहरु इस्वरी प्रसाद रेग्मी, होमनाथ पौडेल र हिरा कुमारी तरामुले कार्यक्रमको सफलताको शुभकामना दिनुभएको थियो । 

रक्तदान जीवनदान हो, भन्दै जे.एन.सर कोरिएन भाषा प्रशिक्षण केन्द्रमा अध्ययनरत दर्जनौं विद्यार्थीहरुले उत्साहजनक सहभागिता जनाएका थिए । जसको समन्वय शुभेच्छुक कुश्माखर पाण्डेले गर्नुभएको थियो । कार्यक्रम संयोजन सुनिता गिरिले तथा सञ्चालन सचिव तिर्थराज काफ्लेले गर्नुभएको थियो भने उपाध्यक्ष प्रकाशमणी खनालले कार्यक्रमको उद्देश्य माथी प्रकाश पार्दै स्वागत गर्नुभएको थियो ।