काठमाडौँ । काठमाडौँ महानगरपालिकाले १७ औं नगरसभाबाट आगामी आर्थिक वर्ष २०८२/८३ को नीति तथा कार्यक्रम ल्याएको छ ।

नीति तथा कार्यक्रम मार्फत मेयर बालेन शाहद्वारा स्थानीय उत्पादन, रोजगारी, उद्यमशिलता र लगानीमैत्री वातावरणलाई प्रवर्द्धन गर्दै समावेशी आर्थिक विकासको आधार सुदृढ गरिने र एक वडा, एक उत्पादन नीतिलाई थप परिस्कृत गर्दै निरन्तरता दिने घोषणा गरिएको छ । साथै उद्यमशिलता प्रवर्द्धन गर्ने उद्देश्यसहित इन्कुबेसन सेन्टर, बीउ पूँजी अनुदान कार्यक्रम र सहकारी सुधार योजनालाई पनि अगाडि बढाइने जनाइएको छ । 

मेयर शाहले महानगरलाई समावेशी, सुशासनयुक्त, प्रविधिमैत्री, सुरक्षित, वातावरणमैत्री र नवप्रवर्तनमुखी स्मार्ट सहरको रूपमा रूपान्तरण गर्ने प्रतिबद्धता समेत नगरसभासमक्ष प्रस्तुत गर्नुभएको छ । उहाँले  आर्थिक वर्ष २०८१/८२ मा कार्यान्वयन हुन बाँकी नीति तथा कार्यनीति र सम्पन्न हुँन बाँकी योजना तथा कार्यक्रमलाई निरन्तरता दिइने, आवधिक, रणनीतिक तथा क्षेत्रगत नीति तर्जुमालाई पूर्णता दिइने जनाउनुभएको छ ।

साथै, बालबालिकाको समग्र शारीरिक, मानसिक तथा सामाजिक विकासका लागि प्रत्येक सामुदायिक विद्यालयमा गुणस्तरीय प्रारम्भिक बाल विकास केन्द्रको स्थापना गरिने, सामुदायिक विद्यालयमा स्पोर्ट एकेडेमी, डिजिटल शिक्षा उद्यमशीलता क्लव स्थापना गर्ने नीति लिइएको छ । त्यसैगरि आपांगता, अटिजम, फरक क्षमता भएका विद्यार्थीका लागि विशेष शिक्षण केन्द्र र पहुँच पुर्याउन सोही अनुसारका पूर्वाधार निर्माण गर्ने जस्ता कार्यक्रमहरु समेटिएका छन् ।

नगरसभामा उपप्रमुख सुनिता डंगोलले आगामी आर्थिक वर्ष ०८२/८३ का लागि २५ अर्व ७६ करोड ४३ लाख ४१ हजार रुपैंयाको अनुमानित बजेट प्रस्तुत गर्नुभएको हो ।