काठमाडौं । राष्ट्रिय सहकारी नियमन प्राधिकरणको अध्यक्षमा सहकारी अभियन्ता डा. खगराज शर्मा नियुक्त हुनुभएको छ । सोमबार बसेको मन्त्रिपरिषद् बैठकले प्राधिकरणको अध्यक्षमा डा. शर्मालाई नियुक्त गरेको हो ।

सरकारको सिफारिसमा राष्ट्रपतिबाट २०८१ पुस १४ गते जारी भएको सहकारीसम्बन्धी केही नेपाल ऐनलाई संशोधन गर्ने अध्यादेश, २०८१ मार्फत मुलुकमा संघ, प्रदेश र स्थानीय तहको कार्यक्षेत्र भित्रका बचत तथा ऋणको मुख्य कारोबार गर्ने सहकारी संस्थाको नियमन गर्न राष्ट्रिय सहकारी नियमन प्राधिकरण गठन भएको थियो । 

लोकसेवा आयोगका अध्यक्ष माधवप्रसाद रेग्मीको अध्यक्षतामा गठित सिफारिस समितिले प्राधिकरणको अध्यक्षका लागि अर्जुन प्रसाद पोखरेल, नारायण पौडेल र डा. खगराज शर्माको नाम सिफारिस गरेको थियो । सिफारिस भएका ३ जनामध्येबाट मन्त्रिपरिषद्को वैठकले डा. शर्मालाई अध्यक्षमा नियुक्त गरेको हो । 

तत्कालीन सहकारी विकास बोर्डका सदस्य सचिव शर्मा लुम्बिनी विशिष्टिकृत सहकारी संघको संस्थापक अध्यक्ष समेत हुनुुहुन्छ ।