काठमाडौं । बागमती प्रदेश बचत तथा ऋण सहकारी संघ लि.(बागमती प्रोस्कून) ले आज आफ्नो पाँचौ बार्षिकोत्सव तथा छैठौं स्थापना दिवस विशेष समारोहका बीच मनाएको छ । संघका अध्यक्ष उद्धव सापकोटाको अध्यक्षतामा भएको स्थापना दिवस कार्यक्रमको उद्घाटन महासंघकी अध्यक्ष ओमदेवी मल्लले गर्नुभएको थियो ।

बागमती प्रोस्कूनले स्थापना दिवसको अवसरमा सहकारी क्षेत्रमा उत्कृष्ट कार्य गर्ने सहकारी संघ/संस्था तथा अभियानको प्रवर्द्धनमा योगदान पुर्याउने अभियन्ता लगायत विविध विद्यामा सम्मान तथा पुरस्कारको घोषणा समेत गरेको छ ।

बागमती प्रोस्कूनबाट विभिन्न १४ विधामा सम्मान तथा पुरस्कारका लागि छनौट हुनुभएका व्यक्ति तथा संघ/संस्थाको नाम सचिव ठाकुर बास्कोटाले घोषणा गर्नुभएको थियो । 

सम्मान तथा पुरस्कार घोषणा अन्तर्गत उत्कृष्ट सहकारी अभियन्ता पुरस्कारबाट महासंघकी अध्यक्ष ओमदेवी मल्ल पुरस्कृत घोषित हुनुभएको छ । त्यसैगरी उत्कृष्ट जिल्ला बचत संघमा काठमाडौं जिल्ला बचत तथा ऋण सहकारी संघ (कास्कून), प्रदेश उत्कृष्ट बचत तथा ऋण सहकारी संस्थामा जनमुखी साकोस दोलखा घोषणा भएको छ ।

त्यसैगरी बचत तथा ऋण सहकारी संस्था–महिला तर्फ लक्ष्मी महिला साकोस पनौती र पूर्व सञ्चालक सम्मान तेजेन्द्र बहादुर खड्का चितवन घोषित हुनुभएको छ । त्यस्तै उत्कृष्ट पदाधिकारी एंव सञ्चालक सम्मान बुडोल सामुदायिक साकोस काभ्रेका अध्यक्ष कैलाश केसी, प्रदेश उत्कृष्ट व्यवस्थापक पुरुषतर्फ ग्रामिण साकोस चितवनका सिताराम सिलवाल र महिलातर्फ जागरण साकोस मकवानपुरकी मेनुका दाहाल पुरस्कृत घोषित हुनुभएको छ । त्यस्तै यो वर्षको पत्रकारिता पुरस्कार मदानी विट काभ्रेका प्रकाशक मोतीराम तिमल्सिनाले प्राप्त गर्ने हुनुभएको छ । 

त्यस्तै संघको उत्कृष्ट कर्मचारीमा व्यवसाय सहायक रामकृष्ण दुलाल, उत्कृष्ट सेवा उपयोग सम्मान नेचुरल साकोस काठमाडौं र उत्कृष्ट बचतकर्ता सम्मान दोलखा जिल्ला बचत तथा ऋण सहकारी संघको नाम घोषणा भएको छ । उत्कृष्ट लगानीकर्ता सम्मान बिन्धवासिनी साकोस काभ्रे र एकीकरण गर्ने संस्थामा बज्रबाराही बचत तथा ऋण सहकारी संस्था मकवानपुरलाई प्रदान गरिने भएको छ । 

संघले उक्त पुरस्कार तथा सम्मान संघको आगामी बार्षिक साधारण सभामा वितरण गर्ने जनाएको छ ।