अछाम । पञ्चदेवल विनायक नगरपालिका वडा नं २, अछाममा रहेको हातेमालो बचत तथा ऋण सहकारी संस्था लि का सदस्यहरुले बचत खेल तालिम 'Savings Game'  लिएका छन् । हातेमालो साकोसको आयोजना र जर्मन स्पार्कसेन्स्टिफ्टुङ्ग (German Sparkassenstiftung) को सहयोग तथा नेपाल बचत तथा ऋण केन्द्रीय सहकारी संघ लि.(नेफ्स्कून) को प्राविधिक सहजीकरणमा सञ्चालित दुई दिवसीय बचत खेल तालिम श्रावण २० गते सम्पन्न भएको हो ।

साकोसका सेयर सदस्यहरुलाई लक्षित गरि आयोजना गरिएको तालिमले सदस्यहरुमा वित्तीय साक्षरता र सशक्तिकरणप्रति जागरुग बनाउने विश्वास रहेको साकोसले जनाएको छ । श्रावण १९ र २०, दुई दिनसम्म सञ्चालित बचत खेल तालिमले सदस्यहरुमा बचत व्यवहार, वित्तीय योजना र समूह गतिशीलतामा व्यावहारिक अन्तर्दृष्टि प्रदान गर्ने काम गरेको छ । 

तालिम प्रशिक्षकका रुपमा नेफ्स्कूनका बरिष्ट  अधिकृत भरत प्रसाद न्यौपाने र व्यवसाय अधिकृत बिदुर खड्काले सहजिकरण गर्नुभएको थियो । साकोसका अध्यक्ष दिपेन्द्र बहादुर धामीको अध्यक्षतामा सम्पन्न तालिममा साकोसका २५ जना सेयर सदस्यहरुको सहभागिता रहेको थियो ।