सिन्धुपाल्चोक । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) र पाँचपोखरी थाङपाल गाउँपालिका बीच सहकारी सवलीकरणको लागि आधारशिला कार्यक्रमको सम्झौता भएको छ । यस आर्थिक वर्षमा दश वर्षीय सहकारी रणनीतिक योजना तर्जुमा र पालिका स्तरीय सहकारी कानून निर्माणमा प्राविधिक सहजीकरण गर्ने विषयगत क्षेत्रमा केन्द्रित रही लिखित सम्झौता कार्तिक १० गते सम्पन्न भएको छ ।

उक्त सम्झौताअनुसार २०८३ जेष्ठसम्म कार्यादेश पूरा गर्ने लक्ष्य राखिएको छ। यो सहकार्यले गाउँपालिकाभित्रका सहकारी संस्थाहरुलाई एकीकरण र दिगो विकासतर्फ उत्प्रेरित गर्ने उद्देश्य राखेको छ ।

कार्यक्रमका क्रममा संघका वरिष्ठ अधिकृत नविन राज दाहाल र पालिका सहकारी शाखा प्रमुख ध्रुव प्रसाद लामिछानेले सहकारीको वर्तमान अवस्था, सम्पत्ति शुद्धीकरण निवारण अभ्यास, सहकारी एकीकरणका विधि र प्रक्रियाका विषयमा विस्तृत कार्यपत्र प्रस्तुत गरेका थिए ।

गाउँपालिका अध्यक्ष टासी लामाले सहकारीहरूको भविष्य दिगो एकीकरण र सशक्त संस्थागत संरचनामा निहित रहेको बताउँदै सबै सहकारी संस्थालाई यस दिशामा अघि बढ्न आह्वान गरे।
कार्यक्रममा गाउँपालिकाभित्र सञ्चालित सहकारी संस्थाका अध्यक्षसहित २९ जना प्रतिनिधि, पालिका सहकारी शाखा र नेफ्स्कूनका प्रतिनिधिहरूको समेत उपस्थिती रहेको थियो ।