मोरङ । लेटाङ बचत तथा ऋण सहकारी संस्था लि.को आयोजना तथा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) र डि.यस.आई. के.को प्राविधिक सहयोगमा लघु व्यवसाय खेल तालिम मोरङको लेटाङमा कार्तिक १५ गते सम्पन्न भएको छ ।

संस्थामा आवद्ध उद्यमी सदस्यहरूका लागि लक्षित आयोजित तीन दिवसीय तालिम कार्तिक १३ देखि १५ गतेसम्म संस्थाको तालिम हलमा सञ्चालन गरिएको थियो । डिएसआईके को तालिम निर्देशिका अनुसार व्यवसायिक निर्णय क्षमता विकास, बिक्री पूर्वानुमान, लक्षित ग्राहक पहिचान, व्यवसायमा आइपर्ने घटनाहरूको प्रभाव विश्लेषण, व्यवसाय प्रवर्धन र विस्तार रणनीति, आय–व्यय विश्लेषण, नगद प्रवाह र सम्पत्ति–दायित्व व्यवस्थापन लगायतका विषयहरू खेलको माध्यमबाट सहभागीलाइ सिकाइएको थियो ।

सदस्य केन्द्रित र समुदायमा आधारित भई संचालित लेटाङ साकोसमा आवद्ध सदस्यहरु मध्येबाट छनौट गरि विभिन्न पेशा–व्यवसायमा आवद्ध २५ जनाको सहभागिता रहेको तालिमको सहजीकरण नेफ्स्कूनका अधिकृत विदुर खड्का र प्रकाश अधिकारीले गर्नुभएको थियो । सिमुलेशन विधिमार्फत खेल अवधिभर सहभागीहरूले उद्यमीको भूमिकामा रही व्यवसाय सञ्चालनका अवसर र चुनौतीहरूको अनुभव प्राप्त गरेका थिए ।

सहभागीहरूले तालिमका विषयवस्तुहरू नौला, व्यावहारिक र प्रभावकारी रहेको अनुभव बाँडेका थिए । तीन दिवसीय तालिम कार्यक्रमको अध्यक्षता संस्थाका नवनिर्वाचित अध्यक्ष कृष्ण प्रसाद निरौलाले गर्नुभएको थियो भने समापन सत्रको सञ्चालन कोषाध्यक्ष तुलसिराम खनालले गर्नुभयो । समग्र कार्यक्रमको व्यवस्थापन संस्थाका व्यवस्थापक सिताराम न्यौपानेले गर्नुभएको थियो ।

लेटाङ साकोसमा ४४ सय सदस्य आवद्ध रहनुका साथै ६७ करोड वढिको वित्तीय कारोवार गर्दै आईरहेको एक उत्कृष्ट वित्तीय संस्था हो ।