काठमाडौं  । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को सहकार्यमा सहकारी विभाग, केन्द्रीय संघ, जिल्ला संघ र साकोसका प्रतिनिधिहरू सहभागी १९ सदस्यीय टोली कार्तिक १६ गते बंगलादेश प्रस्थान गरेको छ । 

टोली “२९औं CCULB–NEFSCUN​​​​​ आपसी अध्ययन तथा अवलोकन भ्रमण कार्यक्रम २०२५” अन्तर्गत बंगलादेशमा आयोजना हुने सहकारी अध्ययन भ्रमणमा सहभागी हुन गइरहेको हो । कार्यक्रम बंगलादेशको Co–operative Credit Union League of Bangladesh Ltd (CCULB) र नेफ्स्कूनबीचको आपसी सहकार्यमा नोभेम्बर २ देखि ८ तारिखसम्म ढाकासहित विभिन्न स्थानमा सञ्चालन हुनेछ ।

भ्रमणको उद्देश्य नेपाल र बंगलादेशका सहकारी अभियानबीच अनुभव आदान–प्रदान, सुशासन अभ्यास, सदस्य–केन्द्रित सेवाको प्रवर्धन र सहकारी व्यवसायमा नीतिगत तथा व्यवस्थापकीय सुधारका सम्भावनाहरू पहिचान गर्नु रहेको छ । अध्ययन भ्रमणले सहकारी क्षेत्रका प्रतिनिधिहरूलाई अन्तर्राष्ट्रिय स्तरको सहकारी प्रणाली, कानुनी ढाँचा, सञ्चालनका अभ्यास र सदस्य सेवाका नवीनतम मोडेलहरू बुझ्ने अवसर प्रदान गर्नेछ ।

भ्रमण टोलीलाई कार्तिक १६ गते  बिहान नेफ्स्कूनको नव–निर्मित भवन, मिनभवनमा आयोजित अवलोकन भ्रमण बारे अभिमुखिकरण कार्यक्रममा संघको तर्फबाट औपचारिक बिदाइ गरिएको थियो । कार्यक्रममा संघका वरिष्ठ उपाध्यक्ष दामोदर अधिकारी, सञ्चालक सदस्य गोपाल गौतम, प्रमुख कार्यकारी अधिकृत डा. शिवजी सापकोटा र प्राचार्य बल्लभ तिमल्सिनाले भ्रमणको उद्देश्य, अध्ययनको औचित्य र उपलब्धिलाई स्पष्ट पार्दै सहभागी प्रतिनिधिहरूलाई अनुशासन, प्रतिनिधित्व र सिकाइको भावनासहित अघि बढ्न प्रेरित गर्नुभयो । वक्ताहरूले सहकारी क्षेत्रको दिगो विकासका लागि अन्तर्राष्ट्रिय सहकार्य र अनुभव आदान–प्रदान अपरिहार्य रहेको र यस भ्रमणले नेपाली सहकारीको अन्तर्राष्ट्रिय सञ्जाल सुदृढ बनाउने विश्वास व्यक्त गर्नुभयो ।

भ्रमण अवधिभर टोलीले बंगलादेशका सहकारी संस्थाहरू, सहकारी नियामक निकाय, प्रशिक्षण प्रतिष्ठान तथा क्रेडिट युनियनहरूको अवलोकन गर्नेछ । साथै, बंगलादेशी सहकारी मोडेलमा अपनाइएका नवप्रवर्तन, सदस्य वित्तीय समावेशीकरण, डिजिटलाइजेसन र आन्तरिक सुशासनका अभ्यासहरूबारे प्रत्यक्ष अध्ययन र अन्तरक्रिया कार्यक्रमहरूमा सहभागी हुनेछ । भ्रमणबाट प्राप्त ज्ञान, अनुभव र विचारहरू नेपालमा सहकारी नीति निर्माण, व्यवस्थापन र सशक्तिकरणमा उपयोगी हुने अपेक्षा गरिएको छ ।