रामेछाप ।  रामेछापको गोकुलगंगा गाउँपालिका ४, बेतालीमा अवस्थित बेताली बचत तथा ऋण सहकारी संस्था लिमिटेड  मा मंसिर ८ गते नियमित निरीक्षण अनुगमन  कार्यक्रमको स्थलगत सुपरिवेक्षण सम्पन्न भएको छ ।

नेपाल बचत तथा ऋण केन्द्रीय सहकारी संघ लि. (नेफ्स्कून) द्वारा सञ्चालित स्क्यान कार्यक्रममा आबद्ध यस साकोसको समग्र संस्थागत कार्यप्रणाली, सुशासन, वित्तीय व्यवस्थापन र सदस्य सेवाको गुणस्तर मूल्याङ्कन गर्नका लागि  सुपरिवेक्षण गरिएको हो ।

सुपरिवेक्षण र सुधार योजना
स्थलगत सुपरिवेक्षण सम्पन्न भएपश्चात् नेफ्स्कूनका कार्यक्रम अधिकृत सुमनराज घिमिरे ले संस्थाको सञ्चालक समिति र व्यवस्थापन समक्ष सहजीकरण गरी सुपरिवेक्षणका क्रममा प्राप्त सुझावहरु माथि छलफल गर्नुभएको थियो । सोही छलफलबाट संस्थाको सुधार योजना तयार गरी तत्काल कार्यान्वयन गर्ने प्रतिबद्धता संस्था पक्षबाट व्यक्त भएको छ ।
कार्यक्रम अधिकृतले संस्थाको कार्यालय व्यवस्थापन, कागजातको तयारी, लेखा प्रणालीको पारदर्शिता र ऋण लगानी तथा असुलीको अवस्थाको सूक्ष्म अध्ययन गरेको थियो । साथै, सञ्चालक समिति र कर्मचारीहरूसँग सहकारीको वर्तमान अवस्था र स्क्यान कार्यक्रमले निर्दिष्ट गरेका मापदण्डहरू पालनाको बारेमा विस्तृत अन्तरक्रिया गरिएको थियो । बेताली साकोसका अध्यक्ष श्दिलिप कुमार भण्डारी ले स्थलगत सुपरिवेक्षणले संस्थालाई थप नीति, विधि र प्रविधिमैत्री बनाउन मद्दत पुग्ने विश्वास व्यक्त गर्दै,  स्क्यान मापदण्डहरू पूर्ण रूपमा पालना गरी आफ्ना सदस्यहरूलाई गुणस्तरीय सेवा दिन प्रतिबद्ध भएको जनाउनुभयो  ।

संस्थाको वर्तमान अवस्था

• कार्यक्षेत्रः संस्थाको कार्यक्षेत्र गोकुलगंगा गाउँपालिकाका ६ वडा (वडा १ देखि ६ सम्म) रहेको छ ।
• सदस्य संख्याः हाल यस संस्थामा ३,४४३ जना सदस्यहरू आबद्ध रहेका छन् ।
• कुल सम्पत्तिः संस्थाको कुल सम्पत्ति २४ करोड लाख रहेको जनाइएको छ ।

स्क्यान कार्यक्रमको महत्त्व
बेताली साकोस २०७० सालदेखि नै नेफ्स्कूनको राष्ट्रिय स्तरको स्तरीकरण कार्यक्रम प्रोवेशन  मा आबद्ध भइ , हाल स्क्यान कार्यक्रम मार्फत स्तरीकरणका लागि प्रयासरत रहेको छ ।
स्क्यान कार्यक्रमले सहकारी संस्थाहरूलाई अन्तर्राष्ट्रिय मापदण्ड अनुसार गुणस्तरयुक्त र व्यावसायिक बनाउन महत्वपूर्ण भूमिका खेल्दै आएको छ । यस किसिमको सुपरिवेक्षणले बेताली साकोसलाई वित्तीय सक्षमता, सुशासन र सदस्य सन्तुष्टिको दृष्टिले थप सशक्त बनाउन प्रेरणा प्रदान गर्ने र आगामी दिनमा संस्थाले राष्ट्रिय स्तरको प्रोवेशन  ब्राण्ड प्राप्त गर्नका लागि बाटो खुल्ने देखिन्छ ।