मकवानपुर । हेटौंडा २ सङ्गम चोक स्थित  हातेमालो बचत तथा ऋण सहकारी संस्था लिमिटेड, मकवानपुरमा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले मंसिर ११ र १२ गते गरेको नियमित निरीक्षण तथा अनुगमन कार्यक्रम अन्तर्गत अभिमुखीकरण तथा  स्थलगत सुपरिवेक्षण मंसिर १२ गते सम्पन्न गरेको छ।  संघले सहकारी क्षेत्रमा सुशासन, दिगोपन र वित्तीय अनुशासन प्रवर्द्धन गर्ने उद्देश्यका साथ नियमित स्थलगत सुपरिवेक्षण कार्यलाई निरन्तरता दिएको छ ।  

सुपरिवेक्षणको उद्देश्य सहकारीहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु र बचतकर्तामा विश्वास अभिवृद्धि गर्नु रहेको छ। निरीक्षणमा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षण,अध्यावधिक, सम्पत्ति शुद्धिकरण निवारण नीति र भाखा नाघेका ऋण असुलीका विषयहरू मूल्यांकन गरिएको थियो।

नेफ्स्कूनका तर्फबाट कार्यक्रम अधिकृत सोविता मैनाली र चितवन सदस्य सेवा कार्यालयका अनुगमन सहायक सुरेन्द्र श्रेष्ठद्धारा भएको अभिमुखिकरण तथा स्थलगत सुपरिवेक्षणमा अध्यक्ष हरि प्रसाद पौडेल, व्यवस्थापक रमला कुमारी  सापकोटा , संचालक समिति लगायत व्यवस्थापन तहका कर्मचारीहरुको सहभागीता रहेको थियो । स्थलगत सुपरीबेक्षण बाट प्राप्त सुझाव ८० प्रतिशत भन्दा बढी अर्को स्थलगत सम्म कार्यान्वयन गर्ने प्रतिबद्धता भएको छ ।