मोरगं। नेफ्स्कूनले नियमित निरीक्षण तथा अनुगमन कार्यक्रम अन्तर्गत भाग्योदय गांउले बचत तथा ऋण सहकारी संस्था लिमिटेड, लेटागंमा स्थलगत सुपरिवेक्षण मंसिर १९ गते सम्पन्न गरेको छ। 

संघले सहकारी क्षेत्रमा सुशासन, दिगोपन र वित्तीय अनुशासन प्रवर्द्धन गर्ने उद्देश्यका साथ नियमित स्थलगत सुपरिवेक्षण कार्यलाई निरन्तरता दिएको छ । सुपरिवेक्षणको उद्देश्य सहकारीहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु र बचतकर्तामा विश्वास अभिवृद्धि गर्नु रहेको छ। निरीक्षणमा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षण, अद्यावधिक, सम्पत्ति शुद्धिकरण निवारण नीति  र भाखा नाघेका ऋण असुलीका विषयहरू मूल्यांकन गरिएको थियो।

नेफ्स्कूनका तर्फबाट कार्यक्रम अधिकृत मुकेश दाहालद्धारा भएको सुपरिवेक्षणमा संस्थाका सञ्चालक समितिका अध्यक्ष नानुदेवि सुवेदी,उपाध्यक्ष लक्ष्मी निरौला, संचालक सदस्यहरु र व्यवस्थापक तिर्था कुमारी कार्की  र व्यवस्थापन तहका कर्मचारीहरुको सहभागिता रहेको थियो। साकोसको अध्यक्षले आगामि संचालक समितिको बैठकबाट संघले संचालन गरेको स्कयान कार्यक्रममा भाग लिई कार्यक्रमलाई निरन्तरता दिने निर्णय गर्नै प्रतिबद्धता जनाउनु भयो ।