सुनसरी । सुनसरी स्थित महिला बचत तथा ऋण सहकारी संस्था लिमिटेड, ईटहरी नेपाल बचत तथा ऋण केन्द्रीय सहकारी संघ लि. (नेफ्स्कून) को नियमित निरिक्षण अनुगमन कार्यक्रम स्क्यानमा मंसिर २५ गते आबद्धता जनाएको छ । 

स्क्यान कार्यक्रमले बचत, ऋण, लेखापरीक्षण तथा आर्थिक कारोबारको वास्तविक स्थिति, सदस्यहरूले पाउनुपर्ने सेवा सुविधा, लाभांश तथा समावेशी सहभागिता, संस्थाभित्र सम्भावित त्रुटी, आर्थिक जोखिम र व्यवस्थापकीय सुधारका लागि सुझाव दिनु र संस्थाको निर्णय प्रक्रिया, नेतृत्वको पारदर्शिता, उत्तरदायित्व र सदस्य सहभागिता मूल्यांकन साथै प्रविधिमा आधारित सदस्य सुचना प्रणालीको अधिकतम प्रयोग मार्फत जोखिम विष्लेषण गरी जोखिम न्यूनिकरणका उपायको खोजि गर्नु सुपरिवेक्षणको मुख्य उद्देश्य रहेको छ । 

सुनसरी स्थित समुदायमा आधारित चार वटा सेवाकेन्द्र र मुख्य कार्यालय ईटहरी आईतबारेमा रहेको महिला बचत तथा ऋण सहकारी संस्था लिमिटेडका अध्यक्ष मुना प्रसाई , कोषाध्यक्ष पुनम थापा मगर, संचालक सदस्य सोभिता पुरी र प्रमुख कार्यकारी अधिकृत जुनुसा पुरी का साथै नेफ्स्कूनका तर्फबाट कार्यक्रम अधिकृत मुकेश दाहाल र सहजकर्ता बिन्दा भट्राईको रोहबरमा दुई पक्ष बीच स्क्यान कार्यक्रमको सम्झौता सम्पन्न भएको छ ।

नेफ्स्कूनले आफ्ना सदस्य संघ संस्थाहरुको गुणस्तर मापन गर्ने उद्धेश्यले स्क्यान कार्यक्रमको सुरुवात गरेको हो । स्क्यान कार्यक्रममा संस्थाको वित्तीय विवरण,शुसासनको अवस्था, कानूनी परिपालना र जोखीम को स्तर मापन गरी स्क्यान मार्फत सुपरिवेक्षण गरिरहेको छ । सुपरिवेक्षणको उद्देश्य सहकारीहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु र बचतकर्तामा विश्वास अभिवृद्धि गर्नु रहेको छ। साकोसका अध्यक्षले यस कार्यक्रमको आबद्धताले  सदस्य र साकोसको बिकास पथमा अगाडि बढ्ने बिश्वास लिएको बताउनुभयो ।