काठमाडौं । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को आयोजनामा सहकारी संस्थाहरूको सुशासन, नियमन र जोखिम व्यवस्थापन सुदृढ गर्न लक्षित नियमित निरिक्षण तथा अनुगमन (स्क्यान) अभिमुखिकरण कार्यक्रम काठमाडौंको नयाँ बानेश्वर स्थित नेफ्स्कूनको केन्द्रीय कार्यालयमा पौष ११ गते सम्पन्न भएको छ ।

सहकारी ऐन २०७४ को दफा २५, ९९ र १०३ अनुसार सहकारी संस्थाहरूमा नियमित निरीक्षण तथा अनुगमन गर्नु पर्ने कानुनी व्यवस्थालाई व्यवहारमा उतार्ने उद्देश्यले सुरु गरिएको स्क्यान कार्यक्रम नेफ्स्कूनको ३८औं स्थापना दिवसको अवसरमा सार्वजनिक गरिएको थियो ।

कार्यक्रममा नेफ्स्कूनका सदस्य सेवा विभाग प्रमुख दुर्गा प्रसाद ढकालले स्क्यान कार्यक्रमको उद्देश्य र महत्वबारे जानकारी दिँदै सबै कार्यक्रमहरूको मूल उद्देश्य सहकारी संस्थाहरूको आन्तरिक सुधार र जोखिम न्यूनिकरण हो, स्क्यान कार्यक्रम अन्तर्गत जोखिम मूल्यांकन, व्यवस्थापन, गुणस्तर सुनिश्चितता तथा एक्सेस, प्रोबेसन र कब्र्स स्तरीकरण मापदण्ड अपनाइएको उल्लेख गर्नुभयो । नेफस्कूनले आफ्ना सदस्य संघ संस्थाहरूको कमजोरी पहिचान गरी आवश्यक सुधारका उपाय अवलम्बन गर्न यो कार्यक्रम एक महत्वपूर्ण उपकरणको रूपमा प्रयोग हुने  स्क्यानमार्फत स्वनियमन, सक्षमता अभिवृद्धि, व्यवस्थापकीय दक्षता विकास र दीगो सहकारी प्रणाली निर्माणमा टेवा पुग्ने बताउनु भएको थियो ।

कार्यक्रममा नेफ्स्कून सञ्चालक सदस्य खेमराज सुवेदीले नेफ्स्कूनले हालै सञ्चालन गरेका स्कयान कार्यक्रममा आवद्धताको लागि आव्हान गर्दै नेफ्स्कूनका तर्फवाट सदस्य संस्थाहरुको सुशासन व्यवस्थापनमा सदैव नवीनतम अभ्यास र विधिहरु निर्माण तथा कार्यान्वयन गर्दै आएको बताउनु भएको थियो ।

कार्यक्रम सञ्चालन नेफ्स्कूनका कार्यक्रम अधिकृत दीपक अर्याल र सोविता मैनालीले गर्नुभएको थियो ।