सुनसरी । ईटहरी स्थित महिला बचत तथा ऋण सहकारी संस्था लिमिटेडमा नेपाल बचत तथा ऋण केन्द्रीय सहकारी संघ लिमिटेड द्वारा पौष २४ गते स्क्यान परीक्षण सम्पन्न भएको छ ।

स्क्यान परीक्षणका क्रममा सहकारीको सफ्टवेयर प्रणाली भित्रको आन्तरिक नियन्त्रण व्यवस्था तथा सम्पत्ति शुद्धीकरण निवारण सम्बन्धी कार्यान्वयनका विषयमा विस्तृत छलफल भएको थियो । 

राष्ट्रिय सहकारी नियमन प्राधिकरणले जारी गरेको मापदण्ड अनुसार नियामकीय अनुकूलन योजना विकास गर्ने विषयमा समेत छलफल गर्दै आवश्यक पृष्ठपोषण प्रदान गरेको जनाइएको छ ।

संस्थाकी अध्यक्ष मुना प्रसाईंले आगामी दिनमा सदस्य पहिचान फाराम तथा नयाँ ऋण लगानी प्रक्रियामा राष्ट्रिय परिचयपत्रलाई अनिवार्य रूपमा लागू गर्दै जाने र नियामकीय अनुकूलन योजना निर्माण गरी कार्यान्वयनमा ल्याइने जानकारी दिनुभयको थियो ।