काठमाडौं । नेफ्स्कूनको आयोजनामा सञ्चालित एक दिवसीय ऋण असुली तथा आन्तरिक कार्यविधि निर्माण कार्यशाला चैत्र १८ गते नयाँ बानेश्वर अल्फा हाउसमा सम्पन्न भएको छ । 

कार्यशालाको उद्देश्य सहकारी संस्थाहरूमा ऋण असुली प्रक्रिया व्यवस्थित, पारदर्शी र प्रभावकारी बनाउने आन्तरिक कार्यविधि तयार गर्नु रहेको छ । सहभागीहरूले ऋण व्यवस्थापन, जोखिम न्यूनीकरण, कानुनी पक्ष तथा सदस्यहरूसँगको समन्वयजस्ता विषयमा छलफल गरेका थिए । 

कार्यक्रमहरूले सहकारी संस्थाहरूलाई दिगो र जिम्मेवार बनाउने विश्वास आयोजकले व्यक्त गरेको छ । १६ जनाको सहभागीतामा भएको कार्यशालामा नेफ्स्कूनका बरिष्ठ अधिकृत प्रेमनाथ वाग्लेले सहजीकरण गर्नुभएको थियो ।  कर्जा असुली न्यायाधिकरण सम्बन्धी कानूनी तथा व्यवहारिक पक्षहरु,न्यायाधिकरणको अवधारणा, कानूनी व्यवस्था,कर्जा असुली न्यायाधिकरणमा उजुरी गर्दा उजुरी प्रतिवेदनमा खुलाउनुपर्ने कुराहरु र सम्बन्धीत ऐन नियमहरुका बारेमा प्रशिक्षण गर्दै यस कार्यशालामा सिकेका कुरा संस्थामा गएर लागु गर्न समेत आग्रह गर्नुभएको छ । 

कानुनी प्रक्रियामा रहेर ऋण असुली तथा धितो लिलामीका प्रभावकारी उपाय, धितो लिलामी प्रक्रिया, धितो सकार गर्ने प्रक्रिया, कालो सूचि, सहकारी नीति तथा ऐनहरूको विषयमा प्रस्तुतीकरण रहेको थियो । तालिम अत्यन्त उपलब्धिमूलक र समयसान्दर्भिक रहेको सहभागीहरुको भनाई थियो ।