काठमाडौं । ललितपुर स्थित समता बचत तथा ऋण सहकारी संस्था लिमिटेड र नेपाल बचत तथा ऋण केन्द्रीय सहकारी संघ (नेफ्स्कून) बीच ‘सुपरभाइजरी चेक्स एण्ड एनालाइसिस फर नेभिगेसन (स्क्यान) कार्यक्रम कार्यान्वयन सम्बन्धी सम्झौता चैत्र १९ गते सम्पन्न भएको छ ।

सहकारी संस्थाहरूको गुणस्तर अभिवृद्धि, जोखिम पहिचान तथा व्यवस्थापनलाई प्रभावकारी बनाउने उद्देश्यले सम्झौता गरिएको हो । स्क्यान कार्यक्रम नेफ्स्कूनद्वारा विकास गरिएको एक एकीकृत अनुगमन तथा सुपरिवेक्षण प्रणाली हो, जसले साकोसहरूको वित्तीय तथा संस्थागत अवस्थाको नियमित मूल्याङ्कन गर्ने व्यवस्था गर्दछ ।

सम्झौता अनुसार समता साकोसले आफ्नो संस्थागत सञ्चालन, वित्तीय अवस्था, आन्तरिक नियन्त्रण प्रणाली तथा जोखिम व्यवस्थापनका विभिन्न पक्षहरूमा नियमित रूपमा मूल्याङ्कन गराउनेछ । यसका आधारमा नेफ्स्कूनले संस्थालाई आवश्यक प्राविधिक सहयोग, सुझाव तथा सुधारात्मक उपायहरू प्रदान गर्नेछ ।

कार्यक्रमको मुख्य उद्देश्य साकोसहरूलाई सुरक्षित, दिगो र पारदर्शी बनाउनुका साथै सदस्यहरूको बचत तथा लगानीको संरक्षण गर्नु रहेको छ। स्क्यान कार्यक्रममार्फत सम्भावित जोखिमहरूको पहिचान गरी समयमै व्यवस्थापन गर्न सकिने विश्वास लिइएको छ ।

सम्झौता कार्यक्रममा नेफ्स्कूनका कार्यक्रम अधिकृत शौभाग्य भट्टराईले स्क्यान कार्यक्रम सहकारी क्षेत्रको गुणस्तरीय रूपान्तरणका लागि महत्वपूर्ण औजार भएको उल्लेख गर्दै, “नियमित अनुगमन, तथ्यमा आधारित मूल्याङ्कन र सुधारात्मक हस्तक्षेपले संस्थालाई दीर्घकालीन रूपमा बलियो र विश्वसनीय बनाउँने धारणा राख्नुभयो ।”
त्यस्तै, शिशिर अधिकारीले साकोसहरूमा सुशासन, पारदर्शिता र उत्तरदायित्व अभिवृद्धिका लागि स्क्यान कार्यक्रम प्रभावकारी माध्यम हुने बताउनुभयो । “जोखिमलाई समयमै पहिचान गरेर व्यवस्थापन गर्न सके मात्र संस्था दिगो रूपमा अगाडि बढ्न सक्ने,” बताउनुभयो । 

समता साकोसका व्यवस्थापक ज्ञान बहादुर अवालेले स्क्यान कार्यक्रममा आबद्ध हुनु संस्थाका लागि महत्वपूर्ण उपलब्धि भएको जनाउँदै, “यस सम्झौताले हाम्रो संस्थालाई अझ व्यवस्थित, पारदर्शी र सदस्य केन्द्रित बनाउन सहयोग पु¥याउनेछ । जोखिम व्यवस्थापन र सेवा गुणस्तरमा सुधार ल्याउने दिशामा महत्वपूर्ण कदम भएको बताउनुभयो । 

सम्झौता कार्यक्रममा नेफ्स्कूनका प्रतिनिधिहरू तथा संस्थाका पदाधिकारी र कर्मचारीहरूको उपस्थिति रहेको थियो, जसमा कार्यक्रम अधिकृत शौभाग्य भट्टराई, शिशिर अधिकारी, समता साकोसका व्यवस्थापक ज्ञान बहादुर अवाले तथा कर्मचारी सजिना अवालेको सहभागिता रहेको थियो । कार्यक्रममा स्क्यान   कार्यक्रमको कार्यविधि, सूचकहरू तथा कार्यान्वयन प्रक्रियाबारे विस्तृत जानकारी आदान–प्रदान गरिएको थियो ।

सहकारी क्षेत्रलाई अझ व्यवस्थित, पारदर्शी र दिगो बनाउने उद्देश्यसहित सञ्चालन गरिएको ‘स्क्यान’ कार्यक्रमले आगामी दिनमा सदस्य साकोसहरूको संस्थागत सुदृढीकरणमा महत्वपूर्ण योगदान पु¥याउने अपेक्षा नेफ्स्कूनले गरेको छ ।