ललितपुर ।  नेफ्स्कून सदस्य सेवा कार्यालय ललितपुरको आयोजनामा ग्वार्कोमा क्युरिमा ३६० कार्यशाला चैत्र १८ गते सम्पन्न भएको छ । 

कार्यक्रममा ललितपुर, भक्तपुर र काठमाडौं जिल्लाका सहकारी संस्थाबाट ३७ जना प्रतिनिधिहरूको सहभागिता रहेको थियो । सहकारी संस्थाहरूको संस्थागत सुदृढीकरण, जोखिम व्यवस्थापन, कानुनी सचेतना तथा समसामयिक विषयहरूमा क्षमता अभिवृद्धि गर्ने उद्देश्यले कार्यशालाको आयोजना गरिएको हो ।

कार्यक्रमका नेफ्स्कूनका अध्यक्ष चन्द्रप्रसाद ढकालले सहकारी क्षेत्रका वर्तमान अवस्था, चुनौती र अवसरबारे मन्तव्य व्यक्त गर्दै सहकारीहरूलाई पारदर्शिता, सुशासन र सदस्यमुखी सेवामा केन्द्रित हुन आग्रह गर्नुभयो । बदलिँदो आर्थिक परिवेशमा सहकारी संस्थाहरूले नवप्रवर्तन र प्रभावकारी व्यवस्थापन मार्फत आफ्नो भूमिका अझ सशक्त बनाउनुपर्ने आवश्यकता औँल्याउनुभयो ।

नेफ्स्कूनका सहायक कार्यकारी अधिकृत दुर्गा प्रसाद ढकालले क्युरीमा सम्बन्धी विस्तृत सत्र सञ्चालन गर्नुभयो । सहकारीहरूको जोखिम पहिचान, अनुगमन प्रणाली, वित्तीय अनुशासन तथा संस्थागत स्वास्थ्य सुधारका व्यावहारिक उपायहरूबारे जानकारी दिनुभयो । सहभागीहरूले क्युरीमा कार्यक्रमले  संस्थाको दीर्घकालीन स्थायित्वमा सकारात्मक प्रभाव पार्ने विश्वास व्यक्त गरेका छन ।

कार्यक्रममा अधिवक्ता प्रियहरी भण्डारीले ऋण असुली प्रक्रिया, कर्जा असुली न्यायाधिकरण, कर्जा सूचना केन्द्र लगायतका कानुनी विषयहरूमा विस्तृत प्रस्तुति दिनुभयो । सहकारी संस्थाहरूले कानुनी प्रक्रिया अवलम्बन गर्दा अपनाउनुपर्ने सावधानी, आवश्यक कागजात तथा व्यवहारिक पक्षहरूबारे स्पष्ट पार्नुका साथै सहभागीहरूसँग अन्तरक्रिया समेत गर्नुभयो। यस सत्रले सहकारीहरूलाई ऋण व्यवस्थापन र कानुनी जोखिम न्यूनीकरणमा महत्वपूर्ण मार्गदर्शन प्रदान गरेको सहभागीहरूको भनाइ रहेको थियो ।

कार्यक्रममा कार्यक्रम अधिकृत शौभाग्य भट्टराईको समन्वय तथा सहजीकरणमा सहायकहरू शिशिर अधिकारी, अनित चौधरी र सूचना महर्जनको उपस्थिति रहेको थियो । कार्यशालाभर सहभागीहरूबीच अनुभव आदान–प्रदान, समूह छलफल तथा व्यावहारिक सिकाइलाई प्राथमिकता दिइएको थियो ।

समग्रमा, क्युरिमा ३६० कार्यशालाले सहकारी संस्थाहरूको संस्थागत क्षमता अभिवृद्धि, कानुनी तथा वित्तीय ज्ञान विस्तार र जोखिम व्यवस्थापन प्रणालीको प्रभावकारी कार्यान्वयनतर्फ महत्वपूर्ण योगदान पु¥याएको निष्कर्ष निकालिएको छ । सहभागीहरूले यस्ता कार्यक्रमहरूलाई निरन्तरता दिनुपर्ने आवश्यकता औँल्याउँदै आगामी दिनमा अझ विस्तारित रूपमा सञ्चालन गर्न आग्रह गरेका छन् ।