नुवाकोट । सहकारी संस्थाहरूको प्रभावकारी अनुगमन, जोखिम पहिचान तथा संस्थागत सुदृढीकरण गर्ने उद्देश्यले “सहकारिता अनुशिक्षण तथा स्क्यान अभिमुखिकरण कार्यक्रम” वैशाख १२ गते सम्पन्न भएको छ । 

नुवाकोट जिल्ला बचत तथा ऋण सहकारी संघ लि.को आयोजनामा तथा नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक सहयोगमा कार्यक्रम आयोजना गरिएको हो ।

कार्यक्रममा जिल्लाभरिका २९ वटा बचत तथा ऋण सहकारी संस्थाका प्रतिनिधिहरूको सहभागिता रहेको थियो । नियमित निरिक्षण तथा अनुगमन स्क्यान प्रणालीमार्फत सहकारीहरूको आन्तरिक अवस्था विश्लेषण, जोखिम मूल्याङ्कन तथा सुधारका उपायहरूबारे अभिमुखिकरण प्रदान गरिएको थियो ।

कार्यक्रमको अध्यक्षता संघका अध्यक्ष नारायण श्रेष्ठले गर्नुभएको थियो भने प्रमुख अतिथिका रूपमा नेफ्स्कूनका अध्यक्ष चन्द्रप्रसाद ढकालको उपस्थिति रहेको थियो । विशिष्ट अतिथिहरूमा जिल्ला सहकारी संघ लि., नुवाकोटका अध्यक्ष शिव प्रसाद अधिकारी तथा जिल्ला बहुउद्देश्यीय सहकारी संघ लि., नुवाकोटका अध्यक्ष ईन्द्रमणि गैरे रहनुभएको थियो । कार्यक्रम सञ्चालन संघका सचिव नारायण प्रसाद खनालले गर्नुभएको थियो ।

कार्यक्रमलाई सम्बोधन गर्दै अध्यक्ष श्रेष्ठले सहकारी संस्थाहरूलाई दिगो र विश्वसनीय बनाउन नियमित अनुगमन र तथ्यमा आधारित व्यवस्थापन आवश्यक रहेको बताउनुभयो । प्रमुख अतिथि ढकालले सहकारी क्षेत्रमा देखिएका चुनौती समाधानका लागि पारदर्शिता र प्रविधिमा आधारित प्रणालीको प्रयोग अपरिहार्य भएको उल्लेख गर्नुभयो । उहाँले स्क्यान प्रणालीले समयमै जोखिम पहिचान गरी सुधारका लागि मार्गनिर्देशन गर्ने विश्वास व्यक्त गर्नुभयो ।

त्यस्तै, विशिष्ट अतिथि अधिकारीले सहकारी संस्थाहरूले नियमअनुसार सञ्चालन भई सदस्यहरूको विश्वास कायम गर्नुपर्नेमा जोड दिनुभयो । विशिष्ट अतिथि गैरेले सहकारीबीच समन्वय र सिकाइ आदानप्रदानलाई सुदृढ गर्नुपर्ने धारणा राख्नुभयो ।

कार्यक्रममा नेफ्स्कूनका कार्यक्रम अधिकृत शौभाग्य भट्टराईले सहजीकरण गर्नुभएको थियो । स्क्यान प्रणालीको प्रयोग, जोखिम विश्लेषण तथा संस्थागत सुधारका व्यावहारिक पक्षहरूबारे विस्तृत जानकारी दिनुभयो । सहभागीहरूले कार्यक्रमबाट प्राप्त ज्ञानले संस्थागत व्यवस्थापन सुधार, जोखिम न्यूनिकरण तथा सेवा प्रवाहलाई प्रभावकारी बनाउन सहयोग पुग्ने बताएका छन् ।