इटहरी । नेफ्स्कून सुनसरी सदस्य सेवा कार्यालयको आयोजनामा इटहरी सुनसरीमा दुई दिवसिय ऋण उपसमितिको क्षमता विकास तालिम वैशाख २८ गते सम्पन्न भएको छ ।  

नेफ्स्कूनका सञ्चालक शालिकराम ढकाल को अध्यक्षतामा सञ्चालन भएको तालिमको उद्घाटन सत्रमा सहकारी संस्थामा बढ्दो कर्जा जोखिम नियन्त्रणका लागि कानुनी आधारसहितको स्पष्ट कार्यविधि अपरिहार्य रहेको धारणा व्यक्त गर्नुभएको थियो । संस्थाको वैधता, पारदर्शिता र विश्वसनीयताबाट नै सदस्यहरूको बचत संकलन हुने भएकाले सुशासनलाई विशेष प्राथमिकता दिनुपर्नेमा जोड दिनुभएकोे थियो ।

सहकारी संस्थामा देखिने अधिकांश समस्याको मूल कारण कमजोर ऋण व्यवस्थापन हुने उल्लेख गर्दै सदस्यहरूको आर्थिक अवस्था, भुक्तानी क्षमता तथा व्यवसायिक सम्भावनाको उचित मूल्याङ्कन गरेर मात्र ऋण प्रवाह गर्नुपर्ने बताउनुभयो । ऋण लगानी गर्दा संस्थाको नीति, मापदण्ड तथा नियामकीय व्यवस्था पूर्ण रूपमा पालना गर्नुपर्ने आवश्यकता औँल्याउनुभएको थियो ।

त्यसैगरी, ऋण लगानी तथा असुली क्षेत्रमा कार्यरत कर्मचारी तथा ऋण संयोजक अनुशासित, जिम्मेवार, निष्पक्ष र कागजात व्यवस्थापनमा दक्ष हुनुपर्ने धारणा व्यक्त गर्नुभयो ।  ऋण स्वीकृतिपूर्व आवश्यक कागजात, धितो मूल्याङ्कन, सदस्यको वित्तीय अवस्था तथा पुनर्भुक्तानी योजनाको सूक्ष्म अध्ययन गर्नुपर्नेमा विशेष जोड दिनुभयो ।

आफ्नै सदस्य वा चिनजानका व्यक्तिलाई आवश्यक प्रक्रिया र कडाइबिना ऋण प्रवाह गर्दा संस्थामा खराब कर्जा वृद्धि हुने, तरलता संकट उत्पन्न हुने तथा संस्थाको साखमा नकारात्मक असर पर्न सक्ने चेतावनी दिनुभयो । साथै, नियमित अनुगमन, समयमै असुली प्रक्रिया, सदस्य शिक्षण तथा वित्तीय अनुशासनमार्फत मात्र सहकारी संस्थालाई दिगो, सुरक्षित र सदस्यमैत्री बनाउन सकिने धारणा व्यक्त गर्नुभएको थियो ।

विभिन्न प्रारम्भिक साकोसका ऋणमा काम गर्ने, ऋण अधिकृत, व्यवस्थापक तथा कर्मचारीहरू गरी ३१ जनाको सहभागिता रहेको थियो । संघका बरिष्ठ अधिकृत भरत न्यौपानेले तालिमको सहजीकरण गर्नुभएको थियो भने सुनसरी सदस्य सेवा कार्यालय प्रमुख रिसभ राज रेग्मीले तालि सञ्चालन गर्नु भएको थियो  । ऋण असुली व्यवस्थापन, जोखिम न्यूनीकरण, धितो लिलामीको कानुनी प्रक्रिया तथा आन्तरिक कार्यविधि निर्माणसम्बन्धी विषयमा गहन छलफल गरिएको थियो । सहकारी क्षेत्रको वित्तीय अनुशासन सुदृढ गर्न स्पष्ट कार्यविधिको आवश्यकता रहेकोमा सहभागीहरूले जोड दिएका थिए ।