काठमाडौँ — एशियाली ऋण महासंघका वरिष्ठ प्राविधिक अधिकृत रञ्जिथ हेटियाराच्ची जेठ ०१ गते (आज) नेपाल आइपुग्नु भएको छ ।  नेपाल बचत तथा ऋण केन्द्रीय सहकारी संघ लि. (नेफ्स्कून) को समन्वयमा सञ्चालन हुने विभिन्न कार्यक्रमहरुमा सहभागी हुन उहाँ नेपाल आउनुभएको हो । 

१५ देखि २३ मे २०२६ सम्म चल्ने यस भ्रमणका क्रममा उहाँले नेपालका सहकारीहरुको वित्तीय संस्थाहरूको क्षमता अभिवृद्धि, प्रविधि हस्तान्तरण तथा नेतृत्व विकासका विषयमा प्राविधिक सहयोग पुर्‍याउनेछन् ।

निर्धारित कार्यक्रम अनुसार काठमाडौँ आगमन लगत्तै टोली आजै नवलपरासी प्रस्थान गरेको छ । नवलपरासीका विभिन्न समुदायमा आधारित बचत तथा ऋण सहकारी संस्थाहरूको अवलोकन, सदस्य सेवा प्रणाली र ग्रामीण वित्तीय अभ्यासहरूको अध्ययन गरिनेछ भने लुम्बिनी क्षेत्रका सहकारीहरूको समेत निरीक्षण गरिने कार्यक्रम रहेको छ । साथै बचत तथा ऋण सहकारीको अध्ययन भ्रमणसँगै नेफ्स्कून सञ्चालक समितिसँग साझेदारी र परामर्शका विषयमा छलफल हुने तय भएको छ ।

सहकारी नेतृत्वलाई थप सुदृढ बनाउन काभ्रेको धुलिखेलमा नेतृत्व विकासका तालिम प्रशिक्षणको समेत आयोजना गरिएको नेफ्स्कून तालिम केन्द्रले जनाएको छ । त्यसैगरी यहि विचमा काठमाडौँमा सहकारी क्षेत्रको वर्तमान कानुनी अवस्था र आगामी मार्गचित्रका बारेमा व्यवस्थापन प्रमुखहरुसँग कार्यशाला आयोजना गरिनेछ । 

नेफ्स्कूनले यो भ्रमणबाट नेपालको सहकारी अभियानमा अन्तर्राष्ट्रियस्तरका उत्कृष्ट अभ्यास, आधुनिक प्रविधि र नेतृत्व विकासका नयाँ आयामहरू भित्र्याउन उल्लेख्य सहयोग पुग्ने विश्वास व्यक्त गरेको छ ।