रामेछाप – रामेछापको मन्थली नगरपालिका-१, मन्थली स्थित शुभेच्छा बचत तथा ऋण सहकारी संस्था लिमिटेडमा जेठ १७ गते नियमित निरीक्षण अनुगमन (SCAN – Supervisory Checks and Analysis for Navigation) कार्यक्रमको स्थलगत सुपरिवेक्षण सम्पन्न भएको छ ।

नेपाल बचत तथा ऋण केन्द्रीय सहकारी संघ लि. (नेफ्स्कून) द्वारा सञ्चालित 'स्क्यान' कार्यक्रममा आबद्ध यस साकोसको समग्र संस्थागत कार्यप्रणाली, सुशासन, वित्तीय व्यवस्थापन र सदस्य सेवाको गुणस्तर मूल्याङ्कन गर्नका लागि सुपरिवेक्षण गरिएको हो ।

स्थलगत सुपरिवेक्षण सम्पन्न पश्चात् नेफ्स्कूनका कार्यक्रम अधिकृत सुमनराज घिमिरेले संस्थाको सञ्चालक समिति र व्यवस्थापन समक्ष सहजीकरण गरी सुपरिवेक्षणका क्रममा प्राप्त सुझावहरु माथि छलफल गर्नुभएको थियो । सोही छलफलबाट संस्थाको सुधार योजना तयार गरी तत्काल कार्यान्वयन गर्ने प्रतिबद्धता संस्था पक्षबाट व्यक्त भएको छ ।शुभेच्छा साकोस ‍नेफ्स्कूनको पूर्ववत जाेखिममा  आधारित साकाेस सुपरिवेक्षण  कार्यक्रम (CURBS) मा आबद्ध भइ, हाल 'स्क्यान' कार्यक्रम मार्फत स्तरीकरणका लागि प्रयासरत रहेको छ ।

'स्क्यान' कार्यक्रमले सहकारी संस्थाहरूलाई अन्तर्राष्ट्रिय मापदण्ड अनुसार गुणस्तरयुक्त र व्यावसायिक बनाउन महत्वपूर्ण भूमिका खेल्दै आएको छ । यस किसिमको सुपरिवेक्षणले शुभेच्छा साकोसलाई वित्तीय सक्षमता, सुशासन र सदस्य सन्तुष्टिको दृष्टिले थप सशक्त बनाउन प्रेरणा प्रदान गर्दछ ।