काठमाडौँ । जनउत्थान बचत तथा ऋण सहकारी संस्था लिमिटेडको आयोजनामा सहकारी सञ्चालन तथा व्यवस्थापन क्षमता विकासका लागि सञ्चालित तीन दिने ‘द लिडर बुटक्याम्प’ काभ्रेको धुलिखेल भिलेज रिसोर्टमा जेठ १७ गते सम्पन्न भएको छ ।

बुटक्याम्पको उद्घाटन समारोहमा प्रमुख अतिथि ज्ञानु पौडेल रहनुभएको थियो । उद्घाटन मन्तव्य राख्दै पौडेलले सहकारी क्षेत्रको समग्र विकास र प्रर्बधनमा आफ्नो तर्फबाट निरन्तर योगदान रहने विचार व्यक्त गर्नुभयो । साकोसका अध्यक्ष गिरी प्रसाद पुनको अध्यक्षतामा सम्पन्न कार्यक्रममा संस्थाका प्रमुख कार्यकारी अधिकृत (प्रकाअ) रन बहादुर थापाको समेत उपस्थिति रहेको थियो ।

सहकारीको आन्तरिक व्यवस्थापन र नेतृत्व क्षमतालाई थप सुदृढ बनाउने उद्देश्यका साथ आयोजना गरिएको बुटक्याम्पमा सञ्चालक समिति, लेखा सुपरिवेक्षण समिति, सल्लाहकार तथा उच्च व्यवस्थापन तहका कर्मचारी गरी जम्मा ३१ जनाको सहभागिता रहेको थियो ।

तालिम अवधिभर नेफ्स्कूनका प्रमुख कार्यकारी अधिकृत डा. शिवजी सापकोटाले गेस्ट लेक्चरर को रूपमा महत्वपूर्ण मार्गनिर्देशन गर्नुभएको थियो भने नेफ्स्कूनका प्राचार्य बल्लभ तिमल्सिना र वरिष्ठ अधिकृत प्रेमनाथ वाग्लेले मुख्य सहजकर्ताको भूमिका निर्वाह गर्दै सहभागीहरूलाई सहकारी सञ्चालनका आधुनिक आयाम र व्यवस्थापकीय क्षमता अभिवृद्धिका विषयमा विस्तृत सहजीकरण गर्नुभएको थियो ।