सिमरा ।  हातेमालो बचत तथा ऋण सहकारी संस्था लि सिमराले आफ्नो १९औँ स्थापना दिवस विभिन्न सम्मान तथा पुरस्कार वितरण कार्यक्रमका साथ जेठ १९ गते सम्पन्न गरेको छ ।

संस्थाको मुख्य कार्यालयमा आयोजित कार्यक्रममा नगरभित्रका सामुदायिक क्याम्पसहरूबाट चारवर्षे स्नातक तहमा समग्र रूपमा प्रथम हुने एक–एक जना छात्र र छात्रालाई पुरस्कृत गरिएको थियो । साथै उनीहरूका अभिभावकलाई सम्मान समेत गरिएको संस्थाले जनाएको छ ।

त्यसैगरी संस्थाका प्रत्येक सेवा केन्द्रबाट एक–एक जना उत्कृष्ट नियमित बचतकर्ता तथा कर्जा कारोबारकर्तालाई सम्मान गरिएको थियो । एक जना बाल बचतकर्ता, जी.सी. १४ निवासी सामाजिक व्यक्तित्व नारायण बर्तौला तथा संस्थाका कर्मचारी सुनिल पटेल लाई पनि सम्मान तथा पुरस्कार प्रदान गरिएको थियो । कार्यक्रममा संस्थाका ६० भन्दा बढी ज्येष्ठ सदस्यहरूलाई समेत सम्मान गरिएको थियो ।

कार्यक्रम संस्थाका अध्यक्ष रामचन्द्र पौडेल को अध्यक्षतामा सम्पन्न कार्यक्रममा प्रदेश सांसद देवनारायण थारु प्रमुख अतिथि रहनुभएको थियो । कार्यक्रममा भोलाप्रसाद अधिकारी लगायत विभिन्न वडाका वडा अध्यक्ष, संघ–संस्थाका प्रतिनिधि तथा सरकारी निकायका प्रतिनिधिहरूको उपस्थिति रहेको थियो ।

कार्यक्रमको सञ्चालन संस्थाका सचिव चूडामणि गौतमले गर्नुभएको थियो । स्वागत मन्तव्य लेखा संयोजक यज्ञबहादुर आले ले राख्नुभएको थियो भने धन्यवाद ज्ञापन उपाध्यक्ष तथा कार्यक्रम संयोजक मनकुमारी खनालले गर्नुभएको थियो ।

स्थापना दिवसका अवसरमा आयोजित सम्मान तथा पुरस्कार कार्यक्रमले शिक्षा, बचत संस्कार, सामाजिक योगदान र ज्येष्ठ सदस्यहरूको सम्मानमार्फत समुदायसँग संस्थाको सम्बन्ध अझ सुदृढ बनाउन सहयोग पुगेको संस्थाले जनाएको छ ।